Meeraq meeraqamminut innarliigaangat, meeraq kisimi isiginiarneqassanngilaq, meeqqalli peroriartorfigisaani inersimasut perorsaanissaminnut sinaakkusiinissaminnullu akisussaaffiat aamma isiginiarneqassaaq.
Meeqqat akornanni nakuusernerit sakkortuumillu imminnut pissusilersorfigisarnerat tamat oqallittarfiini takussaaneri annertusiartuinnarput. Pisut inuit attaveqatigiittarfiisigut siammarterneqartarput, meeqqallu meeraqatiminnut allanut nakuusertut imaluunniit sakkortuumik pissusilersorfigeqatigiinneri takussaaleraluttuinnarput. Inuiaqatigiinni meerartagut ataatsimoorussamik akisussaaffigaagut. Nakuusernermik sakkortuumillu pissusilersorfigeqatigiinnikkut nalaataqarnerlunneq akuersaarneqarsinnaanngilaq, inersimasullu maligassiuinermikkut oqaaqqissaarisarnermikkullu pinngitsoortitsisinnaaneq anguniarlugu suliniuteqartuartariaqarput.
Meeraq meeraqatiminut annersitsigaangat, sioorasaarigaangat imaluunniit qinngasaarigaangat, oqaaqqissaarinissaq kingunerisinnaasaanillu nassuiaanissaq pisariaqarluinnartuuvoq, siusissukkulli pinngitsoortitsiniarluni oqaaqqissaarineq pisariaqarluinnartuuvoq. Perorsaanermi nassuiaaneq aammalu ileqqorissaarnissamik ilitsersuineq pissusissamisut isiginiarneqartariaqarpoq, tamannalu taamaattussaavoq. Nakuuserneq sakkortuumillu pimmatiginninneq akuerineqanngisaannassapput.
Meeqqat ineriartuunnaratik, peroriartornerminni inersimasut akornaniiffigisaasa ataatsimoortarfiisalu kiisalu naleqartitat ulluinnarni aqqusaartagaasa ilusilersortarpaat. Taamaammat meeraq meeraqatiminut innarliigaangat, akisussaaffik tamakkiisoq meeqqamut inississallugu naleqqutinngilaq.
Meeqqat tamarmik nakuuserfigitinnissamut illersorneqarnissaminnik pisinnaatitaaffeqartut aamma ineriartornissamut isumassorneqarnissaminnik pisinnaatitaaffeqartut, Meeqqat pillugit Naalagaaffiit Peqatigiit isumaqatigiissutaanni naqissuserneqarpoq. Tamanna aamma meeqqanut allanut innarliisumik pissusilersortunut atuuppoq. Nakuusernerit uumisaarinerit nikassaanerillu unitsinneqartariaqarput, ersarissunillu killilerneqassapput. Kisianni meeqqat inersimasunik akisussaaffinnik tigusisunik, tunngaviusumillu pissuserissaarnermik ilitsersorneqarnissamut pisinnaatitaaffeqarput.
Meeqqat pisinnaatitaaffiinik meeqqallu peroriartornerminni toqqissisimasumik atugaqarnissaannik qulakkeerinninniarnermi inersimasut akisussaaffeqarnerannik, MIO-p arlaleriarluni saqqummiullugit oqallisigisassanngortinnikuuai. Meeqqat illersorneqarnissamik, isumassorneqarnissamik tusaaneqarnissamillu pisinnaatitaaffeqartut, MIO-mit ilaatigut tikkuarneqarpoq.
Saqqummiussinerni videonilu, piffissamiit piffissamut inuit attaveqatigiittarfiisigut siammarterneqartartuni, piffissamininnguaq taamaallaat takutinneqartarpoq, meeqqallu eqqugaasup oqaluttuassartaa imaluunniit meeqqap nakuusertup oqaluttuassartaa takutinneqarneq ajorlutik. Pisup pinnginnerani, nalaani kingornalu, inersimasut sorliit meeqqat akornanniiNaa
Meeqqat illersorneqassasut kissaatigigutsigu, peroriartornerminni atugassarititaasut namminneq toqqarneq ajoraat eqqaamasassaraarput. Akisussaaffik inersimasuniippoq, ilitsersuinissaq, oqaaqqissaarinissaq tamakkiisoq perorsaasunit angajoqqaajusunit, qanigisaasunit, inuiaqatigiinnilu inersimasunit tamanit pigineqarpoq taannalu akisussaaffik qimarratigisinnaanngilarput.
Ataatsimoorluta persuttaaneq, meerartattalu perorluarnissaannut aqqutissiueqatigiikkisa, meeqqatta pisariaqartippaatigut.
