Ivalo Nguujuk Adolfsen Arnfjord, Kommune Kujallermi meeqqeriveqarfimmi suliatigut aqutsisutut nutaatut atorfinitsinneqarpoq, aggustip ulluisa 15-ianni sulilluni aallartissalluni.
Aqutsisunngortussaq isumaginninnermi perorsaasutut ilinniarsimavoq, aamma perorsaaneq pillugu psykologimimi qaffasissumik ilinniagaqarluni, perorsaanermi nalinginnaasumi mastereqarluni kiisalu perorsaanermi nalinginnaasumi cand.pæd-iulluni. Ilisimatusarfimmissaaq ilisimatusartutut suliaqarpoq.
Ivalo ukiuni qassiini Ilinniartitaanermik Aqutsisoqarfimmi perorsaanikkut ineriartoritsinermik suliaqarsimavoq, soorlu Meeqqerivitsialammut tunngasunik. Ilaatigut meeqqeriveqarnermi inatsisit atuutilersinneqarnissaannik, perorsaanikkut pilersaarusianik, sulisunik piginnaanngorsaanermik kiisalu meeqqat atualinngitsut pillugit pikkorissaanermi ilinniartitsinermilu atortussiornermik suliaqarsimalluni.
-Ivalo Nguujuk Adolfsen Arnfjord Kommune Kujallermi meeqqeriveqarfimmi suliatigut aqutsisunngornissamut akuersimmat assorujussuaq nuannaarutigaarput. Meeqqeriviit meeqqat ukiuini siullerni aalajangiisuulluinnartarput. Taamaammat suliatigut erseqqissumik sammiveqarnissarput paaqqinnittarfinnillu suleqateqaluarnissarput pingaaruteqarpoq. Ivalo suliatigut aqutsisorileratsigu, suliassaqarfimmut tunngasunik ilisimasaqarluinnartumik sulisoqalerpugut, taanna aqutsisunik sulisunilu qanimut suleqateqarluni suliassaqarfimmik ineriartortitsisinnaavoq, Inerisaanermut Ingerlatsivimmi pisortaq Annga Lynge oqarpoq.
Suliatigut aqutsisutut Ivalo Nguujuk Adolfsen Arnfjord Kommune Kujallermi meeqqeriveqarnikkut nukittorsaanermi qitiulluinnartumik inissisimalissaaq. Ilaatigut meeqqerivimmi aqutsisunut sulisunullu ikorfartuissaaq, perorsaanermik pitsanngorsaassalluni kiisalu kommunimi meeqqanut nukarlernut tunngasunik suliaqarnermi ataqatigiinnermik pilersitsissalluni.
