Ataatsimoorluta Aalasap suliniutaanut ilaasoq nittartakkatigut pikkorissaaviup nutaap “Workshop in a Box” atorneqarnera aallartilluarpoq, peqatigiiffiit kattuffiillu soqutiginninnerat ersarissereersimavoq.
Nittartakkatigut pikkorissarfik peqatigiiffinnut meeqqanut inuusuttunullu atugarissaarnermik toqqissisimanermillu nukittorsaanissamut periarfissiivoq. Nittartakkatigut ingerlatassat ingerlanneqareeraangata, peqatigiiffik meeqqanut naleqquttutut Timersoqatigiit Kattuffiannit (GIF) uppernarsaatitaassaaq.
Soqutiginninneq misilittakkallu siulliit
Suliniummi sulisut kattuffiit arlallit attaveqarfigereerpai, taakkulu takussutissiipput nittartakkatigut pikkorissarfik atorluarneqarsinnaasoq, kattuffiillu peqatigiiffimminnut ingerlateqqeerusupput. Ilaatigut nittartakkatigut pikkorissarfik peqatigiiffinnut upalungaarsimanermut pilersaarusiornermik ikiorsiisinnaavoq, soorlu peqatigiiffimmi, unammisitsinerni imaluunniit katerisimaarnerni atorneqarsinnaalluni.
NSP peqatigiiffik siullertut nittartakkatigut pikkorissarfik atorlugu misileraasimavoq. Pikkorissarfik aqqutigalugu peqatigiiffik nammineq meeqqanut politikkeqalerpoq aammalu upalungaarsimanermut pilersaarut ineriartortissimallugu, taakkulu toqqissisimanermik atugarissaarnermillu suliniuteqarnermi ataatsimoorfiusumik tunngavigineqalerput. Maannalu NSP GIF-imi Peqatigiiffik meeqqanut naleqquttutut siullertut allagartaqalerpoq.
Toqqissisimatitsinissaq ataatsimoorussamik qitiutinneqartoq
Workshopimi suliaqarnermi immikkoortut uku ataasiakkaarlugit aqqutissiuussipput:
- Meeqqanut politikkeqarnissamut suliassaq
- Upalungaarsimanermut aalajangersimasumik pilersaarummik suliaqarnissaq
- Meeqqanut pinerliisimannginnermut upparnarsaatit pillugit ilisimasaqarnerulernissaq eqqortumillu ingerlatsinissaq
Pikkorissarfiup peqatigiiffik misilittakkanik, naleqartitanik suleriaatsinillu ataatsimoortumik ersarissunillu sinaakkusersuinissamut ikiussavaa. Taamaalilluni peqatigiiffimmiittut tamarmik – meeqqat, sungiusaasut, angajoqqaat kajumissutsimillu sulisut – peqatigiiffiup suna pillugu sulinersoq paasiuminarnerulersissavaa.
Siunertaavoq peqatigiiffimmi ataatsimoorussamik paaseqatigiinnissamik sinaakkutit ersarissut pilersinnissaat. Ilutigisaanillu pitsaasumik ingerlasut nukittorsarneqassallutik.
Pikkorissarneq nittartakkatigut ingerlasarpoq, peqatigiiffiullu nammineq piffisssaq atorusutartik malillugu naammassisinnaallutik.
Nittartakkatigut pikkorissarfik UNICEF, Paarisa, kiisalu Timersoqatigiit Kattuffiat (GIF) suleqatigiillutik ineriartortippaat, suliniut Ataatsimoorluta Aalasa aqqutigalugu.
