Sisamanngornermiit 9-aniit juulip 12-anut Narsaq nipilersornikkut, kulturikkut, oqallinnermi ataatsimoornermilu qitiussaaq. Angalanissamut akikillisaanikkut kiisalu Nuup Qaqortullu akornanni immikkut timmisartuliinikkut pikialaarnermut nipilersortartut peqataajartortullu amerlanerunissaannut Air Greenland periarfissiivoq.
Aningaasaliineq aaqqissuisunut aningaasanik naleqarpoq. Missingersuutinut iluaqutaavoq taamaalillunilu nipilersoqatigiit amerlanerit aningaasaliissutit taakku iluanni peqataasinnaalerlutik – ilaatigut Naneruaq, Sauwestari inneruuulallu kiisalu ILAAT.
”Aasivisup ullorsiornerani Air Greenland ikiuukkumasimammat uagutsinnut pingaartupilussuuvoq. Nipilersoqatigiit amerlanerit Narsaliarnerisigut pikialaarneq peqataasunut tamanut qiimanarnerulersitsivoq. Assartuussinermi tapiissutitigullu ikiuisoqasimanngitsuuppat peqataarusuttut tamarmik peqataanavianngikkaluarput, ” Aasivik Narsami kajumissutsiminik aaqqissueqataasut ilaat Ivalo Motzfeldt oqarpoq.
Ukiorpassuarni Air Greenland nunatsinni pikialaartitsinerni kulturikkullu aaqqissuussinerni tapersersuisarsimavoq. Aasivimmut tapiineq ingerlatseqatigiiffiup kulturikkut nukittorsaaniarnerata ilagaa, taamaalilluni nuna tamakkerlugu misigisassani peqataasoqarsinnaalerluni.
”Aasivik pikialaartitsinerinnaanngilaq. Katersuuffiit ilagaat, kulturi, oqaloqatigiinneq ataatsimoornerlu nunami inunnik attavileeqataasoq. Taamaattumik Narsami nalliuttorsiornermi amerlanerit peqataanissaannut suleqataanerput nuannaarutigaarput, ” Air Greenlandimi piujuartitsinermut attaveqarnermullu pisortaq Inga Dóra G. Markussen oqarpoq.
Nalliuttorsiorneq oqaluttuarisaanermi pingaarutilik
Nunatsinni Aasivik aasarsioqatigiiffiuvoq sumiiffippassuarni sorlaqartoq, aasaanerani inuit ileqquusumik naapisimaartarlutik. Piffinni nutaanerusuni Aasivik nipilersornermut, kulturikkut, oqallinnermi kinaassutsikkullu katersuuffiuvoq, 1976-imi siullerpaanik Narsami ingerlanneqarluni. Taamaattumik ullorsiorneq immikkut pingaaruteqarpoq, pikialaarneq maanna illoqarfimmut ullutsinni Aasiveqartitsinerup aallartiffianut utersinnaammat.
