Angalaneq takornariaqarnerlu Kalaallit Nunaata aningaasaqarneranut, suliffissaqartitsinermut najukkamilu ineriartortitsinermut qanoq tapersiisarpat? Tamanna angalasunut nutaamik misissuinermi akissutissarsiniarneqassaaq. Taamaattumik Visit Greenlandip tikeraat aammalu Kalaallit Nunaanni najugaqartut angalasut misissuinermut peqataaqqullugit kajumissaarpai.
Visit Greenlandip maanna takornariaqarnermi paasissutissanik tunngavissanik nukittorsaanermut atatillugu aningaasaqarnikkut nutaamik misissuinermik aallartitsivoq. Misissuineq Kalaallit Nunaata Tourism Satellite Accountianik, TSA-mik imaluunniit takornariaqarnermi satellitregnskabimik taaneqartartumik, suliaqarnerup nanginneranut tapersiissaaq.
TSA tassaavoq periuseq nunani tamalaani atorneqartartoq, takornariaqarnerup aningaasaqarnikkut pingaarutaanik uuttortaanissamut atorneqartartoq. Kalaallit Nunaanni taanna atorneqartarpoq, angalaneq takornariaqarnerlu inuiaqatigiinnut qanoq tapersiisarnersut ersarinnerusumik takussutissaqarfiginiarlugu.
Angalasunut misissuinermut akissuteqarnissamut piffissaq sivikitsoq kisimi pisariaqartinneqarpoq. Akissutit ilaatigut pitsaanerusumik paasisaqarfigissavaat, angalasut Kalaallit Nunaannut, Kalaallit Nunaanni aammalu Kalaallit Nunaanniit qanoq angalanersut, qanoq sivisutigisumik nunatsinniittarnersut, sumiiffiit sorliit tikittarnersut kiisalu qanoq aningaasartuuteqartarnersut.
Kalaallit Nunaanni takornariaqarnermi kapitali nutaaq
Visit Greenlandip 2025-mi Kalaallit Nunaata siullerpaamik pisortatigoortumik turismesatellitregnskabia saqqummiuppaa. Tassani takuneqarsinnaavoq takornariaqarneq 2024-mi Kalaallit Nunaata BNP-anut toqqaannartumik 4,9 procentinik naleqarsimasoq, aammalu agguaqatigiissillugu inuit 1.800-it suliffeqartissimagai.
Taamani Kalaallit Nunaat takornariaqarnermi nutaamik piffissamik aallartittoqarfinnguleruttorpoq. 2024-mi Nuummi mittarfik nutaaq ammarneqarpoq, ukiunilu aggersuni tikikkuminassutsip allanngornerata angalasartut angalaneri, atuinerat aammalu naleqarnerulersitsineq qanoq sunniuteqarfiginerai pillugu nutaamik takussutissanik pilersitsisoqassaaq.
Misissuineq nutaaq taamaattumik Nuummi mittarfiup ammarneqarnerata kingorna ineriartortitsineq malinnaaffiginissaanut pingaarutilimmik tapersiissaaq.
Tikeraat nunaqavissullu angalasut tamarmik pingaaruteqarput
Misissuineq angalasunut 2026-mi Kalaallit Nunaannut tikissimasunut imaluunniit Kalaallit Nunaanni angalasimasunut saaffiginnippoq. Tamanna atuuppoq tikeraanut nunanit allaneersunut, inuussutissarsiornermut atatillugu angalasunut, feeriarlutik angalasunut kiisalu Kalaallit Nunaanni najugaqartunut nunap iluani angalasunut.
Akissutit tamarmik isertuussaasumik suliarineqassapput, ataatsimoortumillu kisimi atorneqassallutik.
Siuariartornermiit naleqarluartitsinermut
Misissuineq Visit Greenlandip Kalaallit Nunaata piumasaqaataanik tunngaveqartumik takornariaqarnerup ineriartortinneqarnissaanut suliaqarneranut ilaavoq. Visit Greenlandip 2035-mut periusissiaani anguniagaavoq siuariartorneq naleqarluartitsinermik kinguneqassasoq – najukkani inuiaqatigiinnut, suliffeqarfinnut, pinngortitamut, kulturimut aammalu nuna tamakkerlugu.
Paasissutissat pitsaasut suliaqarnermi tassani pingaaruteqarput. Taakku takornariaqarnerup piffissap ingerlanerani ineriartortinneranut malinnaanissamut, aammalu oqartussanut, inuussutissarsiornermut, destinationinut najukkanilu inuiaqatigiinnut aalajangiinissamut tunngavissanik erseqqinnerusunik pilersitsinissamut periarfissiipput.
Misissuinermut suliniut EU-programmit Grøn Omstillingimit aningaasaliiffigineqarpoq.
Peqataaneq
Misissuineq onlinekkut 30. juuni 2027 tikillugu akineqarsinnaavoq ugguuna: https://surveys.ramboll.com/LinkCollector?key=S3NT9AJVJK31&b_1=6.0
Peqataasut akornanni angalanissamut tunissutisiassaq 25.000 koruuninik nalilik makitsinikkut tunniunneqassaaq.
Visit Greenlandip akunnittarfiit, takornarialerinermik ingerlatsisut, timmisartuutileqatigiit, umiarsuarnut takornariartaatinut attuumassutillit, destinationsselskabit, suliffiit aammalu suleqatit allat kaammattorpai misissuinermik angalasunut attuumassuteqartunut ingerlatitseqqeqqullugit.
