Maniitsumi Imarpik ikaarlugu talittarfik piorsarneqarsimasoq iluatsilluartumik iluarsaanneqareerluni pisortatigut atoqqaarfissiorneqarnissaminut piareerpoq. Suliami illoqarfimmi imaatigut attaveqaasersuutit siunissamut isumannaarneqarput, aammalu nassiussanut, ilaasunut inuussutissarsiortunullu sinaakkutissat pitsaanerusut qulakkeerneqarlutik.
Maniitsumi Imarpik ikaarlugu talittarfik tamakkiisumik iluarsaanneqarsimasoq maanna pisortatigoortumik atoqqaarfissiortinneqartussanngormat, illoqarfiup ineriartornerani nunallu immikkoortuani attaveqaasersuutini pingaarutilimmik alloriartoqassaaq. 2025-p naaneranili suliaq tamakkiisoq tunniuneqarpoq, upernaallu ingerlanerani pariigassat inaarutaasut suliarineqareermata, maanna talittarfik nutaalianik atortoqarluni tamakkiisumik sullissiffiusinnaalerpoq.
Ammaaqqinnermi kommunip, inuussutissarsiortut aammalu illoqarfimmut illoqarfimmiillu imaatigut attaveqaatit killiffiat pingaarutilik nalliussineqarpoq. Attaveqaasersuutit nutaaliaasut atuutilernerini nassiussalerinermi ilaasunillu sullissinermi sinaakkutissat pitsaanerungaatsialissapput, najukkami annertusaanissamut periarfissat taperserneqassapput, aammalu pilersuineq isumannaannerusoq qulakkeerneqassaaq.
Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq Iddimanngiiu Jensen Bianco pisortatigoortumik atoqqaarfissiornermut peqataassaaq, imatullu oqaaseqarpoq:
“Imarpik ikaarlugu talittarfiup tamakkiisumik iluarsaanneqarnera Maniitsumut aammalu nunap immikkoortuani imaatigut attaveqaasersuutinut pingaarutilimmik siuariartitsissaaq. Suleqataasut tamarmik suleqatigiinnerat nukittooq, suliap pitsaasumik ingerlanneqarnissaanut, aammalu suliap ingerlanerani illoqarfimmut pilersuinerup ingerlaannarnissaanut illoqarfiullu ineriartornissaanut qulakkeerinniffiusoq iluarisimaartorujussuuara.”
Sanaartornermi KJ Construction-ip, Royal Arctic Line-p, Royal Greenland-ip najukkamilu sullissisut akornanni qanittumik ingerlalluartumillu suleqatigiinneq ersarippoq. Talittarfiup nutaap, piginnaaneqarluartup, siunissamullu qulakkeerinniffiusunik atortullip suliarineqarnerani akuusut tamarmik annertuumik ataqatigiissumillu sulinissaannik pisariaqartitsiffiusimavoq. Suleqatigiinneq tamannarpiaq, iluarsaassinermi annertuumi killilersuutit pinngitsoorneqarsinnaanngitsut pisaraluartut, Maniitsup pilersorneqarnerata ingerlaannarnissaanut pingaaruteqarsimavoq.
Pineqartumut tunngatillugu paasissutissat
Pisortatigoortumik atoqqaarfissiortitsineq 6. juuli 2026-mi nal. 15.30 Maniitsumi Imarpik ikaarlugu talittarfimmi pissaaq. Kikkulluunniit atoqqaarfissiortitsinermut peqataanissamut tikilluaqqusaapput.
