Nunarput 75-nik ilinniartitsisunngorlaanik, peqqissaasunngorlaanik, tusagassiortunngorlaanik, inuussutissarsiornermi aningaasaqarnermi ilisimatuunngorlaanik, upperisarsiornermi ilisimatuunngorlaanik immikkullu suliaasunik ilinniarsimasunngorlaanik pisuunnguallatsinneqarpoq.
Ilisimatusarfiup ukioq manna asaanerani allagartartaartitsinerani soraarummeertut 75-it soraarummeernermut uppernarsaatitik tiguaat, maannalu ilisimalikkatik, piginnaasatik isiginnittaatsitillu nutaat atorlugit inuiaqatitsinni tapiissuteqarsinnaanngorput.
Ilinniartitsiffinnit napparsimmavinnut, tusagassiorfinnut, suliffeqarfinnut, ilisimatusarnerup iluanut pisortallu suliffeqarfiinut maanna soraarummeertut ukiuni aggersuni nunatsinni ineriartortitseqataasussanngorput.
Allagartartaartitsinermi ukiuni arlalinni angusassamik toraagaqarluni suliaqarsimasimanerit, aammattaarli inuunermi kapitalimik nutaamik aallartitsinerit malunnartinneqarput, allagartartaartummi maanna ilisimasatik atorlugit iliuuseqarlutillu inuiaqatitsinni tapersiisinnaanngorput.
– Nunatsinni annertuunik suliassaqarlunilu periarfissarpassuaqarpoq. Taamaammat inuit suliatigut ilisimasallit pikkorissut, tunniusimasut akissussaaffimmillu tiguserusussuseqartut atorfissaqartippagut. Taakkualu ullumi inuiaqatitsinnut ingerlateqqippagut. Ukioq manna allagartartaartut ukiuni aggersuni nunatsinni ineriartortitsinermi pingaarutilittut atuuffeqarumaarput, rektori Mari Kleist taama oqarpoq.
Aasaanerani allagartartaartitsinermi naammassisut tassaapput:
- Inuussutissarsiornermi aningaasaqarnermut ilisimatusarneq: bachelorit 7-k
- Tusagassiorneq: bachelorit 3-t
- Inatsisilerineq: bachelorit 6-t kandidatillu 8-t
- Inuiaat kulturiat oqaluttuarisaanerallu: bachelorit 4-t
- Ilinniartitsisut: bachelorit 24-t
- Nutserineq oqaluttaanerlu: bachelori 1-q
- Inuiaqatigiilerineq: bachelori 1-q kandidatillu 7-k
- Isumaginninnermut siunnersortit: bachelori 1-q
- Oqaasilerineq, atuakkialerineq tusagassiuutilerinerlu: kandidatit 2-k
- Peqqissaasut: bachelorit 8-t
- Teologi: bachelorit 2-k
- Almen pædagogik: kandidati 1-q
Suliamut piginnaasaqarnermi marlunnik nersornaasiisoqartoq
Allagartartaartitsinerup ilaattut ilinniartunut agguaqatigiissillugu qaffasinnerpaamik karakterinnattunut marlunnut akissarsititsisoqarportaaq.
Royal Arctic Line bachelorinngortumut agguaqatigiissillugu karakteriginnerpaamut nersornaasiuttagaa Mille Louise Rasmussen (Ilinniartitsisoq) tunniunneqarpoq.
Sulisitsisut kandidatinngortumut agguaqatigiissillugu karakteriginnerpaamut nersornaasiuttagaa Maliina Vahlimut (Oqaasilerineq, atuakkialerineq tusagassiuutilerinerlu) tunniunneqarpoq.
Akissarsititsinermi Millip Maliina Vahlillu immikkut suliatigut angusaqarluarsimanerat malunnartinneqarlunilu ilisimatusarfimmi ilinniakkamik naammassinninnissamut qanoq suliniartoqartartiginersoq, tunniusimasoqartartiginersoq tunniutiinnajanngissuserlu ersersinneqarput.
Nunatta siunissaanik qulakkeerinninneq
Ilisimatusarfik inuiaqatitsinni assigiinngitsorpassuartigut atuuffeqartussanik bachelorinik kandidatinillu ilinniagaqartitsisarpoq. Ukioq manna allagartartaartut arlallit toqqaannaq atorfinittut ilaat ingerlaqqiffiusumik ilinniagaqarnermikkut ilisimatusarnikkullu suliassaqarfimmi ineriartornitik nangissavaat.
Taakkununnga tamanut atuuttoq tassaavoq maanna kinguaariit tullernut nunatsinni atugarissaarnermik ineriartortitseqataasussanut, inuussutissarsiornermik nukittorsaaqataasussanut, ilisimasanik nutaanik pilersitseqataasussanut periarfissanullu unammillernartunuttaaq aaqqiissutissioqataasussanut ilaalernerat.
