Sumiiffinni pinngortitami navianartoqartillugu nunassiffiginissaata aarlerinaateqarneranik nalilersuinermut ilusiliamik aalajangersimasumik Kalaallit Nunaat maannakkut siullerpaamik peqalerpoq. Siunertaavoq pinngortitami qaqqap sisoornissaanut, tassaarsuaqarnissaanut, qarsutsinissanut, aputit sisoornissaannut imaluunniit nunap sajunnissaanut aarlerinartoqarfiusuni sivikinnerusumik sivisunerusumilluunniit najuisoqarsinnaanersoq pillugu ilusiliaq assigiissaartoq aallaavigalugu nalilersuisarnissamik qulakkeerinissaq. Pisoqarsinnaanerata aarlerinaateqarnera sumiiffik apeqqutaatinnagu naligiimmik naatsorsuisarnissaq ilusiliami qulakkeerneqarpoq.
Pinngortitami ajunaarnersuaqarnerit iliuuseqarfiginissaat Kalaallit Nunaanni arlalitsigut ataatsimoorluni suliassaavoq, najukkami upalungaarsimasuniit Namminersorlutik Oqartussanut. Tassani pineqarput pitsaaliuilluni suliniuteqarnertut ittut, ajornartoornernik aqutsinermi aammalu naliliinerup ingerlanerani. Taamaattumik sumiiffiit pinngortitami pisoqarsinnaaneranik aarlerinartorsiorfiusut najugaqarfigineqalersinnaanersut, inuussutissarsiorfiusinnaanersut il.il. nalilersuinissamut ilusiliaq ataatsimoortoq kiisalu upalungaarsimanermi suliaqarneq qanoq ittoq pisariaqartussaanersoq, Naalakkersuisut aalajangiuppaat.
“Qaqqap sisoorneranut, qarsutsinernut allatigullu pinngortitami navianartoqarsinnaaneranut atatillugu aarlerinartorsiorneq inuiaqatigiinnit akuersaarneqarsinnaasumiissaaq, peqatigisaanillu Kalaallit Nunaanni ineriartortitsinissaq qulakkeerneqassalluni. Ilusiliami toqqarneqartumi isumannaallisaanerup pitsaasumi inissisimanissaa qulakkeerparput, maleruagassanik sukannersunik inuiaqatigiinni kalluarneqartuni ineriartortitsinissamik akornusiisussanik aalajangersaanata,” oqarpoq Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoq Iddimanngiiu Jensen Bianco.
“Aarlerinartut pinngortitameersut assigiinngitsut Kalaallit Nunaanni sumiiffinni najugaqarfigineqartuni sumiluunniit assigiimmik iliuuseqarfigineqartarnissaat, aarlerinartunik akuersaarnissamut assigiissaartumik aallaaveqarnerup qulakkiissavaa. Taamaaliornermi paasissutissanik tunngaveqarneq aallaavigalugu naligiimmik isiginnittaaseqarluni aarlerinartunut periuseqarnissaq qulakkeerneqassaaq,” oqarpoq Nunanut allanut, Inuussutissarsiornermut, Aatsitassanullu Naalakkersuisoq Mùte B. Egede.
Qaqqap sisuunnginnissaa, qarsutsinerit pinnginnissaat imaluunniit inuiaqatigiinni allanik pinngortitami navianartoqannginnissaa qulakkeerluinnarneqanngisaannartussaapput, kisianni pinngortitami navianartut nakkutiginninnikkut, pilersaarusiornikkut, attaveqaqatigiinnikkut, ilikkartarnertigut periaatsitigullu annikillisinneqarsinnaapput.
Sumiiffinni pineqartuni aarlerinaataasut imminnut sanilliunneqarsinnaanissaat aammalu assigiissaartumik iliuuseqarfigineqarnissaat, pinngortitami navianartunut assigiissaartumik aallaaveqarnermi qulakkeerneqassaaq.
Sumiiffinni ajornartorsiorfiusuni aarlerinaataasunik nalilersuinissamut ilusiliaq toqqarneqartoq pillugu aalajangiinermi ilisimasaleqatigiit nalilersueqqissaarnerat tunngavigineqarpoq, taakkunaniipput ujarassiornerup pinngortitallu iluanni immikkut ilisimasallit, ilaatigut immikkut ilisimasallit avataaneersut, ilaatigut Schweiz-imeersut aamma USA-meersut akuutinneqarlutik. Ilisimasaleqatigiit Kalaallit Nunaannut naleqqussakkanik ilitsersuutinik suliaqarput.
Islandimi, Norgemi aammalu Schweiz-imi misilittakkat ilusiliami atorneqarput.
