Majoriaq Qaqortumi atuartut allagartartaarnerani borgmesteri Malene Vahl Rasmussen pilluaqqusilluni najuuppoq.
Majoriami atuartut allagartassaminnik tunineqalerneranni Kommune Kujallermi borgmesteri Malene Vahl Rasmussen pilluaqqusilluni oqaaseqarpoq.
– Allagartaq pigiligarsi inuunissinni alloriaqqinnissassinnut pissarsiarerusullugu anguniagaqarsimavusi, misilittagaqarnerulersimallusilu maanna alloriaqqissinnaalerpusi. Inuiaqatigiinnummi sulinikkut iliniagaqaqqinnikkullu tunniussinnaasasi annertoorujussuupput, taamaammat inuunermi anguniagaqartuarnissaq eqqaamassavarsi, piumavikkaannimi sunaluunniit anguneqarsinnaavoq, Malene Vahl allagartartaartunut ilaatigut taama oqarpoq, nangillunilu.
– Allagartartaartut, angusassinnik pilluaqqigitsi! Ullumi ulloq anguniakkamut nutaamut alloriarfittut pigigisiuk, imminut tatigalusi siunissami misigiumaakkasi suugaluarnersut ornillugit.
Majoriaq Qaqortumi allagartartaartut tallimanngornermi juunip 12-ianni allagartartaarput.
