Arnanut 1. januar 1992 kingorna akuersitinneqaratik imaluunniit ilisimanngisaminnik naartunaveersaaserneqarsimasunut taarsiissuteqarnissamik Naalakkersuisut immikkut aaqqissuussaannut Naalakkersuisut 35 millioner koruunit qulakkeerpaat.
Februaarip 26-ani nalunaarutigineqartutut, peqqinnissamut suliassaqarfiup 1. januar 1992-imi akisussaaffigilerlugu tiguneqarnerata kingorna arnanit akuersitinneqaratik imaluunniit ilisimanngisaminnik naartunaveersaaserneqarsimasunit aningaasatigut ajunngitsorsiassaqartitsinissaannut qinnuteqaatinik, naatsorsuutigisamit amerlanerungaatsiartunik Naalakkersuisut tigusaqarput. Taassuma kingunerisaanik qinnuteqaatit suliarineqarnissaannut, aningaasanik ajunngitsorsiassaqartitsisinnaanermullu aningaasanik suli qulakkeerinissamik pisariaqalersitsivoq. Naalakkersuisut maanna nalunaarutigaat, aningaasatigut matussutissat katillugit 35 millioner koruunit maanna qulakkeerneqartut.
Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen imak oqaaseqarpoq:
”Peqqissutsimut tunngatillugu isumaqatigiissummit, aningaasatigut ajunngitsorsiassamut Naalakkersuisut immikkut aaqqissuussaannut 35 millioner koruuninik maanna immikkoortitsisoqarnera soorunalimi naammagisimaarnarpoq. Siusinnerusukkut nalunaarutigineqartutut, naatsorsuutigineqaqqaartumit qinnuteqaatinik amerlanerungaatsiartunik Naalakkersuisut tigusaqarput, tamannalu pillugu aningaasat immikkoortinneqareersut saniatigut aningaasanik qulakkeerinissaq pisariaqarsimalluni. Maanna tamanna anguarput, nuannaarutigeqaaralugu. Ilutigisaanik suliap matumap qanoq annertutigineranik, suliallu pisariaqartumik pimoorussisumik aamma peqqissaarussamik suliarineqartariaqarneratut suliamik suli suliarinninnissatta qanoq pingaaruteqartigineranik ersersitsivoq. Arnat taamanikkut ilaatigut niviarsiaqqat annertuumik ikilerneqarput, Naalakkersuisuniillu minnerpaamik iliuuserisinnaasaq aningaasatigut ajunngitsorsiineq maanna matussusersinnaanngulerpoq naak pisoq misigisaq aningaasanik taarserneqarsinnaanngitsoq taamaattorli neriuppugut arlaatigut iluaqusiisinnaasut.”
