Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisup Iddimanngiiu Jensen Bianco-p nalunaarutigisinnaavaa, Tunumi ilaasunik angallassinermik allannguiniarluni pitsannguiniarlunilu suliniutit pillugit Air Greenlandip oqaloqatigineqarnera aallartinneqartoq. Naalakkersuisoq ilaasunik angallasinermut aaqqiissutissanik, nunatsinni ataqatigiissitsinermut pitsannguutaasinnaasunik nassaarniarluni suliniuteqarpoq.
Tamatuma saniatigut Naalakkersuisup Iddimanngiiu Jensen Bianco-p 27. – 29. juunimi Ittoqqortoormiinut angalanissani pilersaarutigaa. Ittoqqortoormiinnerani attaveqaasersuutit pillugit isumasioqatigiissitsisoqassaaq. Tamatuma saniatigut innuttaasunik ataatsimiititsisoqassaaq, kiisalu Ittoqqortoormiini sullissisunut inuussutissarsiortunullu arlalinnut pulaartoqassaaq ataatsimeeqateqartoqassallunilu.
Ittoqqortoormiinut tikeraarnermi najukkami inuussutissarsiornikullu pissutsinik paasinninnissap qulakkeerneqarnissaa, kiisalu soqutigisaqartut ilaatigut kiffartuussinissamut isumaqatigiissutit attaveqaasersuutillu allat pillugit suliat ingerlaqqinnerini isummersuinissamut periarfissinneqarnissaat siunertarineqarpoq.
Naalakkersuisoq Iddimanngiiu Bianco Jensen oqaaseqarpoq:
” Tunu suliassaqarfittut pingaartippara. Taamaattumik qanittukkut Ittoqqortoormiinut tikeraarnissamut aammalu attaveqaasersuutit pillugit isumasioqatigiissitsinissamut innuttaasunillu ataatsimiititsinissamut periarfissaqalertussaagama nuannaarutigisorujussuuara. Innuttaasut najukkamilu inuussutissarsiortut oqaloqatiginissaannut, aammalu isummersuutaannik immersuissutaannillu pingaarutilinnik pissarsinissamut qilanaarpunga. Ittoqqortoormiini innuttaasut.”
Innuttaasunik ataatsimiititsinissamut piffissaq kingusinnerusukkut nalunaarutigineqarumaarpoq.
