Iikkat kumaasa Nanortalimmi siammarsimanerujussuat paasineqarpoq. Ajornartorsiut maanna illoqarfimmi inuit angerlarsimaffiini, inunnik sullissiveqarfinni illunilu allani takussaalerpoq. Iikkat kumaat Kommune Kujallermi siammaateratarsinnaapput Nunattalu sinneranut aamma siammaateratarsinnaallutik.
Taamaammat siammariartornerannik killileeqataanissamut innuttaasut tamaasa ikiuuteqqullugit kajumissaarpavut.
Kikkut tamarmik iikkat kumaanit eqqugaasinnaapput
Iikkat kumaat eqqiluisaannginnermut eqqiaasannginnermulluunniit attuumassuteqanngillat. Angerlarsimaffinnik tamanik eqquisinnaapput, taavalu atisat, taskit, nassatat, peqqutit allallu inuit pigisaat aqqutigalugit siammaassinnaallutik.
Iikkat kumaqalersimanerat pilertornerusumik paasineqartarpat akiorneqalerpatalu siammaanneq ajornanginnerusumik unitsinneqarsinnaavoq.
Iikkatit kumaqarpata pasitsaassaqaruilluunniit
Allanut illersorneqarnissaannut ikiuutigit
o Ilaquttat, ikinngutit sanilitillu pulaarnaveersaakkit.
o Pulaartoqarnaveersaarit.
o Allani tukkunaveersaarit.
o Illoqarfinnut nunaqarfinnullu allanut pisariaqanngitsumik angalanaveersaarit.
o Iikkat kumaasa nassatatigut atortutigulluunniit siammaannissaat ilimanaateqarpat timersornikkut unammiuaarnernut, aaqqissuussinernut imaluunniit katersuuffinnut annerusunut peqataaqinak.
o Atisat, skuut, taskit, nammattakkat kuffertillu immikkut eqqumaffigikkit.
Suliffiit, Atuarfiit meeqqeriviillu
Angerlarsimaffimmi iikkat kumaqarpat ajornartorsiut piaarnerpaamik qanoq iliuuseqarfigineqassaaq suliffimmut, atuarfinnut, paaqqinnittarfinnullu ataatsimoortarfinnullu allanut siammaannissaat pinngitsoorniarlugu.
Pequtinik atornikunik angerlaasseqinak
Iikkat kumaat pequtit atornikut aqqutigalugit siammakkajuttarput.
o Nalaasaarfinnik, madrassinik, siniffinnik pequtinilluunniit allanik silamut qimaannakkanik eqqagassanngortitanilluunniit angerlaasseqinak.
o Pequtit atornikut, tunissutisiatit allanilluunniit pisiatit mianersuutikkit.
o Pequtit atornikut angerlarsimaffimmi atulertinnagit misissorluaqqaakkit.
o Pequtit iikkat kumaqaratarsinnaappata nalunaaqqutserluarsimatinnagit igeqinagit.
Nalaasaarfik madrassiluunniit ataaseq kumaqalersimasoq siammaannermik nutaamik aallarniisinnaavoq.
Iikkat kumaannik nassaarpit? Erngerlutit ima iliorit
1. Pilertortumik qisuariaateqarit
Utaqqissanngilatit. Ajornartorsiut pilertornerusumik iliuuseqarfigineqarpat siammarnissaa ilimanaateqannginnerulissaaq.
2. Allanut attaveqarneq erngerlutit killileruk
Ajornartorsiutip aaqqinneqarnissaata tungaanut pulaarnerit katersuunnerillu pinaveersaakkit.
3. Angalaqinak
Timersornikkut unammiuaarnernut, aaqqissuussinernut, pikkorissarnernut peqataaqinak imaluunniit iikkat kumaasa siammarfigisinnaasaannut allanut angalaqinak.
4. Pequtit pigisalluunniit allamut nooqinagit.
Madrassit, siniffiit, nalaasaarfiit, atisat pigisalluunniit allat ineqarfinnut allanut nooqinagit.
5. Attartortitsisut illuutileqatigiiffiilluunniit attavigiuk
Ajornartorsiut erngerlutit nalunaarutigiuk.
INI-p inaataani ineqaruit INI oqarasuaat 70 10 00 atorlugu attaviguuk.
6. Ilitsersuutigineqartut malikkit
Eqqiaaneq, errorsineq akiuinerlu pillugit peqqussutigineqartut maleqqissaakkit.
Ataatsimoorluta siammarnerat unitsissinnaavarput
Iikkat kumaat inunnut pigisanullu nooqataasarput. Taamaammat tamatta pilertortumik qisuariaateqarnissamut iliuuseqarnissamullu akisussaaqataavugut.
Akisussaassusilimmik iliornitsigut ilaquttavut, sanilivut, suliffivut Nunattalu sinnera illersorsinnaavavut.
