Kalaallinit aneerusissiatut meqqiliarineqarsimasoq, Meqqusaalik, Danmarkimi nersorniarneqarpoq, tassani Jægernes Magasin’imiit piniarnermi kavaajarineqartartuni Meqqisaalimmi piniarnermi kavaajat ilaat pitsaanerpaatut toqqarneqarmat.
Kalaallit atisanik meqqiliaat, Meqqusaalik, Danmarkimi tupaallatsitsivoq. Jægernes Magasin’imiit misissuinermi meqqit ilaat, Malik annoraaq, sapaatip akunnerup naanerani Fynimi silap unamminarsimanerata kingunerani piniassutissatut kavaajani pitsaanerpaatut toqqagaavoq.
Issittumut tulluarsagaq
Ukioq manna ukiut qulit qaangiupput, KNI Sisimiut nammineq atisanik inerisaalluni aallartimmat. Aallartinnerani atisaliat Pilersuisoq-pisiniarfinni atuisunit pisiniarineqartussatut siunertaqarsimagaluarput, suliniulli ineriartupallassimalluni.
Meqqusaalimmi siunertarineqarpoq, issittumi atisat pitsaasut pilersinneqarnissaat – nungullajaatsut, kissalaartut aamma amerlanerit akilersinnaallugit akimikkut naleqquttut.
Novembari 2025-mili nioqqutit aamma danskit atuisunit pisiniarineqarsinnaalersimapput, saqqummiussinermullu atatillugu meqqiup pingaarnertut nioqqutissaatai Jægernes Magasin’imut nakerisarsiunngitsumik nalilersorneqartikkumallugit nassiunneqarsimallutik.
Naliliisartut meqqeq ilisimasaqarfigisimanngilaat, erngertumilli Kalaallit Nunaanninngaanneernera immikkuullarissutut ersarissarsimallugu.
“Meqqusaalik aneerusissiatut kisimi meqqiliarineqarsimanngilaq,” magasin ilaatigut allaaserinnilluni ersarissaavoq, atisat Kalaallit Nunaanni piniartunit aalisartunillu, issittumi atisat oqortuunissai pillugit, misilittakkagarineqartut aallaavigalugit inerisarneqarsimasoq.
Tamanna Danmarkimit tigulluarneqartoq KNI-mit nuannaarutigineqarpoq.
“Malik Annoraajutitta aamma qarlippaajutitta Danmarmikimi tigulluarneqarnera soorunami nuannaarutigaarput. Atisat nunani kiannerusuni, kiassassutsip 2 aamma 11 akornanni anoreqarlunilu siallertumi, atorneqarsinnaanersut pissanngatisgisimavarput,” tuniniaanermi pisortaq Anders Stenbakken oqaaseqarpoq
