Kommunip oqaluttuarisaanerani siullermeertumik 1 mia.kr. sinnerlugit Qeqqata kommunia isertitaqarpoq, isertitaralugit 1.048 mia.kr.
2025-mi sanaartornerup ingerlalluarnera sulisinnaasullu amerlanerpaat sulinerat pissutigalugit innuttaasut suliffeqarfiillu akileraarutaasigut 2025-mi isertitat naatsorsuutigisamiit 33.7 mio.kr.-inik annertunerupput. Innuttaasullu 2025-mi akileraarutaat 2024-imut sanilliullugit 19 mio.kr.-inik qaffariarlutik. Illutaungaani suliffeqarfiit akileraarutaat 8.2 mio.kr.-inik appariarput.
”Sulisinnaasut amerlanerpaat sulinerat kommunimiit qujamasuutigaarput, taakkuuppummi atugarissaarnermut ineriartortitsinermullu aningaasalersuisugut”, taamak borgmester Malik Berthelsenip innuttaasut qujassuteqarfigalugit oqarpoq.
Isertitalli kisimik qaffakkiartunngillat. Ingerlatsinermummi aningaasartuutit ukiup ataatsip ingerlanerani 37.4 mio.kr.-inik qaffariariarput, ukiullu tallimat ingerlaneranni 174.5 mio.kr.-inik qaffariarlutik, taakkunannga 105 mio.kr. inunnik isumaginninnermut tunngassuteqarlutik.
”Ingerlatsinermut aningaasartuutit sukkasuumik qaffakkiartornerat eqqarsaatigalugu sukannersumik ingerlatsinissarput suli pisariaqarpoq. Taassuma saniatigut Kangerlussuarmi innuttaasut 30% missaanik ikilinikuupput, sanaartorneq unikaallaqqavoq, raajartassiissutillu ikilinikuullutik, taamaattumik mianersornissarput suli pisariaqarpoq”, borgmesteri mianersoqqusilluni taamak oqarpoq.
2025-mi ingerlatsinermut 884 mio.kr. atorneqarsimapput, taakkunannga aningaasarsianut 480 mio.kr. atorneqarsimallutik.
Sanaartornermut 117 mio. atorneqarsimapput, 2024-mut sanilliullugit 24 mio.-inik annertunerullutik.
