Naalakkersuisut Pridemut atatillugu ukiup aappassaa juunip qaammataani assigiinngiiaartuunermik nunatsinnilu inunnik LGBT+-nik tapersersuinertik malunnartinniarpaat.
Pisortatigoortumik malunnartitsineq Naalakkersuisut nittartakkakkut qupperneranni SoMe-nilu neriusaap qalipaataanik ilisarnaasiinikkut pissaaq. Tamatuma saniatigut juunimi Naalakkersuisut illorsuata saavani erfalasoq neriusaap qalipaataanik qalipaatilik amuneqartassaaq.
Tamatuma saniatigut Meeqqanut, Inuusuttunut, Inatsisit atuutsinneqarnerannut Naligiissitaanermullu Naalakkersuisoq juunip 13-iani Nuuk Pride-parademi oqalugiassaaq.
Meeqqanut, Inuusuttunut, Inatsisit atuutsinneqarnerannut Naligiissitaanermullu Naalakkersuisoq Mariane Paviasen Jensen, ima oqaaseqarpoq:
”Naalakkersuisut ukiut appassaa Pridemut atatillugu erfalasumik neriusaap qalipaataanik qalipaateqartumik amusinissaata nalunaarutigisinnaanera nuannaarutigisorujussuuara. Nunatsinni innuttaasunik LGBT+-nik tapersersuinitta taamatullu aamma nunatsinni nammineq kinaassuseqarnissamik tapersersuinitta takutinnissaa pingaaruteqartupilussuuvoq. Tamanna piffissami inunnut LGBT+-nut naligiissitaanermullu nunarsuarmi akerliunerup annertusiartornera ingammik eqqarsaatigalugu. Allanik isumalinnik akaarinninnginnermut isummanullu pigiliutiinnakkanut inissaqartitsisoqannginnera, allatut ajornartumik takutittariaqarparput. Taamaammat kikkut tamarmik ukioq manna Pridemut peqataanissaanut kaammattorumavakka, tamattalu ataatsimoornermi pingaaruteqarnitsinnik eqqaasitsinissamut, namminerlu kinaassuseqarnissatsinnut pisinnaatitaaffeqarnitsinnik eqqaaseqatigiilluta.
Naalakkersuisut sinnerlugit tamassi Pridesiorluarnissassinnik kissaappassi!”
