Piffissami matumani GNC-p Utoqqarmiut Kangerluarsunnguanni erngup nukinganik nukissiorfiup tungaani umiarsualivimmiit nukissiorfittaassap tungaanut aqqusinniorneq ingerlatiinnarpaa.
Isumannaallisaaneq pillugu sumiiffik – umiarsualivik kiisalu sanaartorfiit nalunaarsukkat ilanngullugit – tamanut matoqqatinneqarallarpoq. Tamanna pisuttunut, piniartunut, angallattunut kiisalu sumiiffimmi allatut atuisunut tamanut atuuppoq.
Sumiiffimmi oqimaatsunik angallanneq ingerlanneqarmat, mianersoqqussutit kiisalu sanaartorfiup iserfigineqannginnissaanut nalunaaqutsersuutit ataqqineqarnissaat pingaaruteqarpoq.
Nalunngilarput sumiiffik sunngiffimmi sammisassaqarfittut piniarfittullu pingaaruteqartoq, taamaattumillu killissarititaagallartunut paasinninnissaq qinnutigineqarpoq. Taakkuami sanaartornerup isumannaatsumik aammalu pitsaasumik naammassinissaanut pisariaqarluinnarput.
Erngup nukinganik nukissiorfiup allilerneqarnera siunissami Nuummut nukissamik mingutsitsinngitsumik pilersuinissamut pingaarutilimmik inissisimassaaq.
