Kommune Qeqertalik-mi innuttaasut apriilimi maajimilu kommunimit akiligassiissutit kinguaattoorsimanerisa kingorna immikkut akiliisitaanavianngillat. Kommuni innuttaasut akornanni naammagittaalliuuteqartoqarsimasoq kingorna erseqqissaavoq.
Kommune Qeqertalik-mi innuttaasut akornanni nalornineq pilersimavoq, apriilimi maajimilu kommunimit akiligassiissutit ilaat piffissaq eqqorlugu nassiunneqarsimannginnerisa kingorna.
Kommuni maanna paasissutissiivoq innuttaasunut kommunimut akiliutissat kinguaattoornerannut atatillugu immikkut gebyrinik akiliisitsisoqassanngitsoq.
Tamatumani ilaatigut pineqarput eqqaavilerinermut, anartarfilerinermut, meeqqerivinnut kiisalu kommunip akileeqqusissutaanut allanut uteqqiattartunut akiligassiissutit.
Innuttaasut ilaasa naammagittaalliuutigisimavaat nalinginnaasumik akiligassiissutinik piffissaq eqqorlugu akiliisarlutik, taamaattorli Akiliisitsiniartarfimmut ingerlateqqinneqarsimanertik.
Akiliisitsiniartarfimmut suli ingerlatitseqqiisoqarsinnaavoq
Kommunip Namminersorlutik Oqartussallu akornanni malittarisassat atuuttut naapertorlugit, akiitsut akilerneqanngitsut akiligassap akilerneqartussanngornerata kingorna ullut 21-it qaangiutsinnagit akilerneqarsimanngippata Akiliisitsiniartarfimmut ingerlateqqinneqassapput.
Tamanna isumaqarpoq innuttaasut ilaat misigisinnaagaat akiitsut akilerneqarsimanngitsut Akiliisitsiniartarfimmit Akileraartarnermut Aqutsisoqarfiup akiliisitsiniarnermut systemia aqqutigalugu akilersinniarneqartut – naak akiligassiissutit kinguaattoorlutik nassiunneqarsimagaluartut.
Kommuni erseqqissaavoq pisumi matumani kingusinaarluni akiliinermut atatillugu immikkut gebyrinik akiliisitsisoqassanngitsoq. Aamma Akiliisitsiniartarfik innuttaasunut eqqaasitsissutit nassiunneqarsimasinnaasut pillugit gebyrinik akiliisitsissanngilaq.
