Perorsaanermik Ilinniarfik (PI/SPS) aamma Avannaata Kommunia nutaamik suleqatigiinnissamut isumaqatigiissusiorput, isumaqatigiissullu ilinniagaqarnermut siunissamilu inunnik isumaginnittunngortussat sulinerannut nukitunerusumik atassusiliissaaq.
Isumaqatigiissut inunnik isumaginnittunngorniarlutik bachelorinngorniartut Ilulissani meeqqat atuarfiini aamma ulluunerani paaqqinnittarfinni ilinniarnerminnut atatillugu suliffimmik misiliinissaannik periarfissiissaaq. Suleqatigiinneq misiliutigalugu suniummut ilaavoq tassanilu suliffimmik misiliineq nalinginnaasumik suliffimmik misiliisarnermit allaaneruvoq.
Anguniagaavoq ilinniartut sulinermik misilittagaqarnerulernissaat saniatigullu ilinniarfeqarfiit kommunillu akornanni suleqatigiinnerup nukittorsaanissaa ilinniartunut, sulisunut meeqqanullu iluaqutaasussanngorlugu.
“Nuannersorujussuuvoq maannakkut suleqatigiinnissamik isumaqatigiissusioratta. Upperaarput ilinniartut ilinniagaqarnerminni suliffeqarfimmut qaninnerulernertik annertuumik pissarsissutigissagaat. Tamatuma saniatigut PI/SPS aamma Avannaata Kommuniata akornani suleqatigiinneq nukittorsarparput paaqqinnittarfinnut meeqqanullu nuannaarutaasussanngorlugu,” Avannaata Kommuniani borgmesteri Lars Erik Gabrielsen (s) oqarpoq.
”Meeqqat illersugassarivagut aamma suleqatigiissutigigutsigu tamanna meeqqat ilinniartullu siunissaasa nukittorsarneqarnerannik isumannaarinneqataassaagut”, nangeqqilluni oqarpoq.
Misiliutigalugu suliniut ersarissunik sinaakkusiinissamik, qanimut aqqutissiuussinissamik aamma sulinermut misiliinerit ataavartumik nalilersorneqartarnissaannik isumannaarinnissaaq.
Suleqatigiinnissaq Kalaallit Nunaanni inunnik isumaginninnermut ilinniagaqarnerup iluani eqaannerusumik sulinermullu tunnganerusunik ilinniartitsinermik ineriartortitsinissamut ikaarsaarneruvoq pingaarutilik.
Ilinniartut ilinniarnerminnut atatillugu suliniummut peqataassapput aamma taamaammat paarlattaasunut imaluunniit sulisooreersunut taarsiissutaanaviarnatik.
