Meeqqat tapii kiisalu ikiorsiissutit assigiinngitsut juunip aallaqqaataani ikineqartussat naatsorsuutigineqassaaq kinguaattuulaarsinnaaneri tamanna it-kkut ajutooqqanermik pissuteqarpoq.
Kommuneqarfik Sermersuumi innuttaasunit sulisunillu it-ikkut annertuumik ajutooqqanermik unammilligassat suli misigineqarput. Aaqqiissutissarsiorneq suli sulissutigineqarpoq.
Oqartussat Kommuneqarfik Sermersuumi annertuumik it-ikkut ajutooqqanerup aaqqiissuteqarfiginissaa suli sulissutigaat. Ajutooqqaneq kommunip digitalikkut aaqqiissutaanut arlalinnut kinguneqarpoq taamaattumillu nalinginnaasumiit sullissinerup sivisunerunissaa naatsorsuutigineqassaaq.
Kommune ammasarfinni nalinginnaasuni suli ammasarpoq. Taamaattumik innuttaasut ornigullutik suli ikiorneqarsinnaapput. Tamatuma saniatigut digitalikkut atortut atornagit suleriaatsit aallartinneqarput taamaalillutik innuttaasunik kiffartuussinerit sapinngisamik ingerlatiinnarneqarsinnaaniassammata.
Kommunimit oqartussat attuumassutillit suleqatigalugit it-ikkut atortut nalinginnaasumik ingerlalernissaat sapinngisamik sulissutigineqarpoq..
