Nanortalimmi atuartut tallimanngornermi maajip 22-anni naggataarlutik atuarput.
Ileqquusoq malillugu 10. klassimi atuartut naggataarlutik atuarnerminni atuartunut ataatsimoortitsillutik nuannisarfiulluartumik sammisaqartitsipput.
Ullormi nuannisarfiusumi ullaaralaakkut 10. klassit ilinniartitsisutik angerlarsimaffiinut aqqusaartorlugit aajortorpaat, kingornalu atuartut angajoqqaavi peqatigalugit atuarfimmi ullaakkorsioqatigiittoqarpoq.
Ullaakkorsioqatigiinnerup kingorna atuarfimmi klassinit tamanit peqataaffigineqartumik pinnguartitsilluni sammisaqartitsisoqarpoq, naggataatigullu 10.klassit ilinniartitsisullu arsamik unammisinneqarlutik.
-Ulloq nuannerluinnarpoq, sammisaqartitsinermut 10. klassimi atuartuutigut nammineerlutik pilersaarusiornikuupput, tamanna nuannisarfiulluni iluatsilluarpoq, aaqqissuusilluarnerallu tulluusimaarnaqaaq. 10. klassit piffissami aggersumi inaarutaasumik misilitsittaqattaarnermini angusaqarluarnissaanik kissaappagut, Nanortallip Atuarfiani pisortaq, Nicolaj Strange Lykke oqaluttuarpoq.