Suleqatigiissut arsaannerup inuiaqatigiinni kalaallini katersuuffittut aammalu kinguaariinni illoqarfinnilu arlalinni naleqartitanik pitsaasunik siuarsaavittut atorneqarnissaanik ataatsimut anguniakkamit aallaaveqarpoq. Tamatuma saniatigut arsaanneq sammisassaqartitsinerillu peqqissutsimut siuarsaataasut arlallit aqqutigalugit KAK Brugsenilu inooriaatsimik timimik atuiffiunerusumik siuarsaassapput.
KAK-mi siulittaasoq, Kenneth Kleist, oqarpoq:
– Brugseni uagut periusissiukkamik suleqatiginiarluta aalajangermat Kalaallit Nunaanni arsaannermik nersorinnippoq. Suleqatigiilluta timersornermik ineriartortitsinerussaagut tamatumalu saniatigut arsaannerup iluani naleqartitanik – ataatsimoornermik, peqqissutsimik ataqatigiinnermillu – nalimmassaassalluta.
Brugsenimi pisortaaneq, Allan Kristoffersen, ima oqarpoq:
– Suliffeqarfiugatta Kalaallit Nunaanni ilaasortanit pigineqartoq pingaartipparput inuiaqatigiinnut tunniussaqartarnissarput peqqissutsimullu siuarsaataasunik amerlanerusunik suliniuteqartarnissarput. Tamakku Brugsenimut periusissiamut ilaajuartuupput. Arsaanneq Kalaallit Nunaanni katersuuffiuvoq asseqanngilluinnartoq, suleqatigiissummullu tamatumunnga atatillugu timersornermik arsaannermilu ataatsimoornermik ineriartortitseqataarusuppugut. Naleqartitavut KAK-p naleqartitaanut naleqqulluinnarput, suleqatigiissullu neriulluarfigaarput.
”Arsaqatigiippugut – Vi spiller sammen”
5.500-nik arsaattartoqarami arsaanneq Kalaallit Nunaanni timersuutini pingaarnersaavoq. Suleqatigiissut nuna tamakkerlugu attaveqatigiilluarnerulersitsissaaq peqqissutsimullu ataatsimoornermullu atatillugu suliniutinik nutaanik pilersitsiviusassalluni.
Aammattaaq arsaannermi kulturimik siuarsaanerunissamik anguniagaqarnissaq nunanilu tamalaani angusaqarluarniarnissaq siunertaralugu Brugseni KAK-p ineriartortinnerunissaanut aningaasanik tapiissuteqarluarpoq.
Suleqatigiissummut ilagitillugu logoliortoqarpoq ima allagartalimmik: ”Arsaqatigiippugut – Vi spiller sammen”. Logo KAK-p logoanut atassuserneqarpoq Brugsenip ilusilersuutaanik tigulaariffiusumik, logolu taanna siunissami suleqatigiissummut takussutissaasassaaq.
Brugseni suleqatigiissut aqqutigalugu Kalaallit Nunaanni arsaannermi malunnarnerusumik inissisimaffeqalissaaq aammalu timersornermik pisiniartartunut innuttaaqatigiinnullu qaninnerulersitsissalluni. Suleqatigiissummut atatillugu Brugseni KAK-mi arsaattartut atisaannik pisortatigoortunik pisiniarfiit ilaanni qanittukkut tuniniaasalissaaq. Suliniut tamanna Kalaallit Nunaanni arsaannermut tapersiinissamik ajornaallisaataassaaq tamatumalu saniatigut nuna tamakkerlugu nunanilu tamalaani arsaannermik saqquminerulersitsissalluni.
Brugsenimi pisortaaneq, Allan Kristoffersen, oqarpoq:
– KAK-mik arsaattartunillu meeqqanut inuusuttunullu maligassaasunik suleqateqarnitta ineriartortinnissaanut qilanaarpugut. Anguniagaraarput piumassuseqalersitsisunik misigisaqartitsisarnissaq aammalu arsaannermik maani pisiniartartunut sulisunullu pingaaruteqarnerulersitsinissaq.