Inuusuttut marluk suliassinneqartartut Kalaallit Nunaanni sammisassanik aamma piorsarsimassutsikkut nioqquteqarfinnik inerisaanissamut suliniuteqarput. Suliffeqarfik PR Consultimi Liam Fussing Rosbach aamma Daniel Robert Platou Kristiansen tusarnaartitsinernik, unammisaqattaarnernik aamma fimiliornernik suliaqartarput – angusaqarluarusussuserlu uani uninngilaq.
Aqqutaa oqitsuinnaasimanngikkaluartoq, akiuunnerup aallarnisaasartutut silatunerulersissimavai.
Liam Fussing Rosbach, Ilulissani inunngorlunilu peroriartortoq, Nuummut 2017-imi eqaarsaarnermut sammisumik ilinniarfissuariarluni nuuppoq, tassani Liamip ulluinnarni soqutigisani, sulorarneq, aallutileruttorfiani. 2019-imi siullermeerluni aallarnisaasutut nammineq suliffeqarfiutimini Red Leapimi, ilaatigut filmiliorneq, DJ-itut suliaqarneq aamma annikinnerusunik sammisaqartitsinerit suliaralugit, alloriaqqaarluni.
Daniel Robert Platou Kristiansen, Colombiami inunngorpoq Nuummilu peroriartorluni, atisanut meqqinik 2021-mi aallarnisaasutut aallartippoq. Ullumikkullu PR Consultimi Greenland Martial Arts pilersinnikuusani ingerlataralugu.
– PR Consult assigiinngitsullu pilersitagut ukkatigisorujussuuvagut, Daniel oqaluttuarpoq.
Nipilersornermik aqutsinermiit sammisassanut aamma filminut
PR Consult – suleqatigiit kinguliaannit, Platou aamma Rosbach, aallaavigalugu atserneqarsimasoq – aallaqqaammut nipilersornermik aqutsinermut isumassarsiat tunnganerusimagaluarput. Kalaallit Nunaannilu niuerfiup taamak annikitsiginerata suliffeqarfimmik piviusumik inerisaanissaq allamut siunnerfeqarfiulersimalluni.
Ullumikkut immikkut sammisaqartitsinerit aamma filmiliornerit suliarisarpagut.
– Ukiumut marlunnik annertunerusunik sammisassaqartitsisarpugut aammalu filmiliornernik suliaqartarluta. Pilersitsiffiit ilaanni isumannaallisaaneq aamma ataqatigiissaarineq suliarisarpagut, Liam nassuiaavoq.
Nunat tamalaat filmiliornertarnerannut peqataaneq aamma Nuummi allanik annerusunik sammisassaqartitsinernut peqataaneq misilittakkanut ilaapput. Ilaatigut Greenland Martial Arts-sammisassaqartitsinermut aqqissuisutut, kampsprtimik taaneqartartumik unammisaqattaartitsinerit, nipilersorneq aamma aliikkusersuineq ataatsimoortillugit misigisassatut inerisarsimallugit.
Ukioq kingulleq ilaatigut franskit filmiliornerannut annerusumut peqataasimapput, allanillu aamma arlalinnik filmilioqateqarsimallutik, ilaatigullu teknikkikkut aaqqiissutissanik, isumannaallisaanermut aamma ataqatigiissaarinermut tunngasunik suliaqarsimallutik.
Kukkunernit ilikkakkat
Aallarnisaasartut marluk suliaminni aningaasaqarnikkut unammillernartut sammisassaqartitsinerillu naatsorsuutigisamik ingerlanngitsut pikkunarsinnaaneri oqaatigisinnaavaat.
Kalaallinik nipilersortulerlutik siullermik decembarimi, julefrokostertoqaleruttorfimmi, tusarnaartitsisimapput.
– Inunnik takkuttoqarpiarsimanngilaq, aningaasatigullu annaasaqaataasimalluni, marluullutik oqaluttuarput.
Ullulli 20-t qaangiutiinnartut tusarnaartitseqqissimapput, tusarnaartitsinerullu annaasaqarneq sinneqartooruteqalersissimallugu.
Kingorna Ilulissani kalaallinik nipilersortulerlutik, annerusumik teknikerilerisoqarlutillu filmiliortoqarlutik, tusarnaartitsinissaq siunniuppaat. Uani aamma misilittakkat akisunaarlugit pisiarineqarsimapput.
– Niuerfiup paasilluaqqaarnissaa aamma eqqortumik ulluliinissaq pingaaruteqartoq paasivarput. Kukkusarpugut, aammali ilinniarfigisarlugit, Daniel oqaaseqarpoq.
Inuusuttunut marlunnut aallarnisaasartut ineriartornerannut kukkunerit pingaaruteqarsimapput.
– Suliatsinni suli inuusuttuuvugut ilinniarnissatsinnullu ammalluta. Inuit misilittagallit tigooraaffigerusuttarpagut immitsinnullu pitsanngorsarniartuarluta, taamak oqaaseqarput.
Suliffeqarfiinnaanngilaq
Liamimut aamma Danielimmut suliffeqarfik aningaasanut kisimi tunngasuunngilaq. Piffissartik inuusuttunullu tapersersuiniarlutik kajumissutsimik suliaqarneq aamma aallutaraat.
PR Consult ilaatigut filmiliornermut aamma DJ-iunermut tunngasunik inuusuttunut workshopeqartitsisarpoq meeqqanullu sammisassaqartitsinernut tapersuisarluni – aamma meeqqanut immikkut pisariaqartitsisunut.
– Isumaqarpugut, ikiuuffigisinnaasatsinni tunniussisinnaanissarput pingaaaruteqartoq, Liam oqaaseqarpoq.
Tamarmik timersornermut soqutigisaqartorujuupput. Liam Nunarsuaq tamakkerlugu sulorarnermi dommeriusarpoq, Danielillu ukiorpassuarni taekwondornermik misilittagaqarluni siornatigut nunarput sinnerlugu unammisartuusimalluni.
Daniel ilaatigut kajumissutsiminik taekwondorluni Nuummi unammisaqattaarnermut pilersaarusiorluni inerisaasimavoq, tassani klubbinut allaffissorneq oqinnerulissasoq suliniutigisimallugu.
Greenland Martial Arts ineriartuinnaavippoq
Suliffeqarfiup iluarsartuullugu pilersaarusiaasa ilangivaat, Greenland Martial Arts, taannalu Danieliup pilersitaraa, pilersinneqarneraniillu ullumikkut annertungaatsialersimalluni.
Aaqqissuussami kampsportimik taaneqartartumik unammisaqattaarneq nipilersornertalerlugu, angisuumik isiginnaarusissianngorlugu, aningaasaliisunit takusassiaqartillugu aamma toqqaannartumik aallakaatinneqarluni ingerlanneqartarpoq – Nunarsuarlu tamakkerlugu timersornermi sammisassaqartitsilluni unammisaqattaarnernit tigulaariffiusumik isumassarsiaasimalluni.
– Amerlasuut isumaqarismagaluarput, tamanna Kalaallit Nunaanni iluatsinneqarnavianngitsoq. Inuilli allaanerusoq takusinnaavaat – aliikkusersuineq, nipilersorneq misigisassarlu annertooq, Daniel oqaaseqarpoq.
Ullumikkut aaqqissuussaq inunnit Kalaallit Nunaata avataaneersunit malinnaffigineqartarpoq, unammisartuniillu aamma suleqatissanit soqutiginninneq annertusigaluttuinnarluni.
Aallarnisaasartut marluk malillugit anginerusumik aaqqissuussiniaraanni, ukiup affaa sinnerlugu pilersaarusioreersimanissaq pisariaqartarpoq. Akisussaaffiit teknikkilerisunut, naatsorsuuserisunut, isumannaallisaasunut, eqqumiitsuliortunut, aningaasaliisunut aamma akilersuinermut immikkoortinneqarlutik agguaanneqartarput.
– Sapinngisarput tamaat sullarinniartarpugut. Inuppassuuvugut kajumissutsimik ikiuuttartut, tamatigullu nutaanik ilikkagaqartarluta, Daniel oqaluttuarpoq.
Nuummi tusarnaartitsivissamik amigaateqarneq
Inuusuttut aallarnisaasartut ajornartorsiutini annerpaatut unammillernartitaat tassaavoq Nuummi tusarnaartitsivissanik amigaateqarneq.
Oqaasitigisaat malillugit aaqqissuussinerit timersortarfinnik Inussivittut ittunik atuisariaqartarnerannik unammillissuteqartarpoq, pineqartummi timersornermut atorneqarnissaannut pilersinneqarnikuummata.
– Nipigiffiusinnaasumik pilersitsinissamullu inissaqarluartumik tusarnaartitsivissamik amigaateqarpugut, Liam oqaaseqarpoq.
Taamaattumik peqatigiiffimmik pilersitseqataasimapput, tassani piffissaq ungasissoq isigalugu Nuummi piorsarsimassutsimut tunniusimasumik sammisassaqartitsiffiusinnaasumillu takorluukkanik pilersitsiffiusinnaasumik – tusarnaartitsinissamut, ataatsimeersuarnernut nutaaliorlunilu sammisassaqartitsinernut inissaqartitsisunik piviusunngortitsinissamik suliniuteqarsinnaalerumallutik. Tamanna piffissaq sivisooq atorlugu iluarsartuullugu pilersaarusiortariaasoq nassuerutigaat, neriuutigaluguli naggataavani illorsuaq kalaallinik aamma avataaneersunit tusaamasanik tusarnaartitsiffiusinnaasoq pilersaarusiap inernerilerumaaraa.
Pingaartillugu iliuuserisassap tullia
PR Consult suli ineriartorsinnartoq, Liam Fussing Rosbach aamma Daniel Robert Platou Kristiansen tullianut iluarsartuullugu pilersaarusiartik piareersaleruttorpaat. Ulloq 30. maaji rockimik nipilersortartut Uummat, Chilly Friday aamma DDR Nuummi illorsuaq timersortarfimmi tusarnaartitsissapput
Aaqqissuussaq iluatsittussatut isikkoqalereerpoq, billitsit amerlanerit tunineqareersimammata
– Kalaallit Nunaanni nipilersornermik suliaqartunik inerisaaqataarusuppugut, inunnillu puiukkiunneqartussanik pilersitserusulluta. Misigisassat qanoq annertunerulernissaat pitsaanerulernissaallu eqqarsaatigiuaannarparput, taamak oqaaseqarput.