Naalakkersuisut peqqinnissaqarfimmi utaqqisarnerit sivikillisarniarlugit, katsorsaanerit amerlanerulersinniarlugit aammalu napparsimasut isumannaatsuunissaat pitsanngorsarniarlugu 2026-mi aamma 2027-mi 20 millionit koruuninik immikkoortitsiniarput.
Aningaasat amerlanersaat, tassa 13 millionit koruunit missaanniittut, napparsimasut 180-it Danmarkimi seeqqumikkut suliaritinnissaannut atorneqassapput. Suliaritinnerit taakku Nuummi Dronning Ingridip Napparsimmavissuani ukiumut seeqqumikkut suliaritittartut 100-t missaanniittut saniatigut ingerlanneqassapput.
Tamatuma saniatigut kikkertimik misissortinnerit 400-t missaanniittut, pingaartumik inalugarsuakkut aamma inalugarsuup naaneratigut kræfteqarsimanerminnik katsorsarneqareersimasut misissorneqarnerannut, ingerlanneqassapput.
– Nalunngilara innuttaasut amerlasuut utaqqisarnerit ajornartorsiutigigaat. Utaqqineq ulluinnarni anniarnermik toqqissisimannginnermillu kinguneqarsinnaavoq. Taamaattumik amerlanerusut pilertornerusumik suliaritinnissamut imaluunniit misissortinnissamut periarfissinneqassapput, Peqqissutsimut Innarluutilinnullu Naalakkersuisoq Anna Wangenheim oqarpoq.
Kapitittarneq katsorsaanerillu pitsaanerusut
Naalakkersuisut aamma innuttaasut qulit tikillugit qaratsamikkut ajoqusersimasut Danmarkimi sungiusarteqqinneqarnissaannik neqerooruteqarniarput.
Peqatigitillugu nunatsinni naartusut tamarmik RS-virusimut akiuussutissamik kapitinnissamut neqeroorfigineqassapput, taamaalilluni naalungiarsuit anersaartorniarnermikkut sakkortuumik napparsimalernissaannut illersorneqarsinnaassallutik.
Aammattaaq napparsimasut isumannaatsuunissaannik pitsanngorsaanissamut immikkoortortamik pilersitsinissamut 2,5 millionit koruunit immikkoortinneqassapput. Immikkoortortap napparsimasut naammagittaalliuutaannit misilittakkat atorlugit kukkunerit pinaveersaartissavai.
20 millionit koruunit taakku Naalakkersuisut siusinnerusukkut peqqinnissaqarfimmi sipaarniartoqannginnissaa anguniarlugu 60 millionit koruuninik aningaasaliissutigisaasa saniatigut immikkoortinneqassapput.
Siunnersuut Inatsisartuni Aningaasaqarnermut Akileraartarnermullu Ataatsimiititaliamit akuerineqaqqaassaaq, suliniutit aallartinneqarsinnaalersinnagit.
