Avammut tunisinermi akit appariarnerat pissutigalugu Royal Greenlandip saarullinnik nalinginnaasunik tunisinermi akit appartippai. Nutaaq-saarulliit akii allanngussanngillat, suliffeqarfillu naapertorlugu aalisartut suli ukiup qaammataani siullerni pingasuni akigitinneqartunit amerlanerusunik pissarsissapput.
Royal Greenlandip nunarsuarmi niuerfinni akit appariarnerisa kingorna saarullinnik nalinginnaasunik tunisinermi akit appartippai. Suliffeqarfik taama ilisimatitsivoq.
Royal Greenland naapertorlugu suliffeqarfiup saarullimmut ataatsimut isertitai ukiup aallartinneranut naleqqiullugit ikinnerulerput. Suliffeqarfiulli erseqqissarpaa akit allanngortinneqarnerisa kingorna aalisartunut akiliutigineqartartut suli 2026-p qaammataani siullerni pingasuni akigitinneqartunit qaffasinnerussasut.
– Saarulliit avammut tunineranni akit appagaangata niuerfinni ineriartornermut naleqqussartariaqartarpugut. Kisianni akit allanngornerisa aalisartunut pisariaqanngitsumik sakkortuumik eqqortitsinissaat kissaatiginngilarput, Royal Greenlandimi saarullinnik ingerlatsinermut pisortaq Sten Sørensen oqarpoq.
Nutaaq-saarulliit akii allanngussanngillat
Akinik appartitsineq Nutaaq-saarullinnut atuutinngilaq. Royal Greenlandip taakkununnga tunisinermi akigititai allanngussanngillat, suliffeqarfik naapertorlugu immikkut ittumik pitsaassuseqarnerat tunisinermi qaffasinnerusumik akeqartitsinissamut periarfissiimmat.
Royal Greenlandip ilaatigut Amerika Avannarleq Nutaaq-saarullinnik tuniniaanissamut periarfissagissaartutut tikkuarpaa.
Suliffeqarfiup aamma aalisakkat ataasiakkaat annertunerusumik atorluarneqarnissaat sulissutigaa, taamaalilluni pisat nalingat qaffanneqarsinnaaqqullugu. Ilaatigut saarulliit niaqui igiinnarneqaratik maanna tunisassiorfinni suliarineqartarput avammullu tunineqartarlutik.
– Akit nikerarnerannut nukittunerusumik inissisimanissamut pitsaanerpaamik iliuusissaq tassaavoq saarulliit sapinngisamik annerpaamik naleqalersinnissaat, Sten Sørensen oqarpoq.
Taassuma aalisartut Nutaaq-saarulliit pillugit suleqatigineqarnerat kiisalu sinnikunik atorluaanerup tunisinermi akinik appartitsisariaqarnerup annikillisarnissaanut iluaqutaanerat erseqqissarpaa.
Saarulliit nalinginnaasut akii qanoq annertutigisumik appassanersut allannguutillu qaqugu atuutilissanersut nalunaarummi allassimanngilaq.
Paasissutissarsiffik: Royal Greenland.
