Pingasunngorneq septembarip 23-at aallarnerfigalugu Brugseni pisiniarfiutimini tamani sapaatip-akunneri tamaasa peqqinnermut ullorititaqalissaaq. Pingasunngornerit tamaasa pisiniartartut ilaasortallu inerititanik naatitanillu nutaanik tamanik pisinermi saniatigut 15 procentimik akikillisaavigineqassapput. Suliniut Brugsenip peqqinnerulersitsinissamik suliniutaanut nutaamut, ”Peqatigiilluta peqqinnerulaarta”-mut, ilaavoq.
Ulluinnarni inerititanik naatitanillu amerlanerusunik nerinissaq ajornannginnerullunilu akikinnerussaaq. Tamanna suliniummi ”Pingasunngornermi peqqinneq” tunngavigineqarpoq. Suliniut septembarip 23-anniit Brugsenip pisiniarfiutaani tamani aalajangersimasumik ingerlanneqartalissaaq.
Pingasunngornerit tamaasa inerititat naatitallu nutaat tamarmik akii appartinneqartassapput, taamaalilluni saniatigut 15 procentimik sipaaruteqartoqarsinnaassalluni. Peqatigisaanik Brugseni nerisassiornissamut, inerititanik naatitanillu amerlanerusunik akulinnut, isumassarsisitsinerussaaq.
Suliniut kisimi ingerlanneqassanngilaq. ”Pingasunngornermi peqqinneq” suliniummut annertunerusumut ”Peqatigiilluta peqqinnerulaarta”-mut ilaavoq. Tassani Brugseni ulluinnarni nioqqutissanik niueruteqartartutut inissisimaffini atorlugu peqqinnarnerusunik toqqaanissap ulluinnarni ajornannginnerulersinnissaa anguniarpaa.
– Isumaqanngilagut peqqinnerulerniarluni inuunerup ullormiit ullormut tamakkiisumik allanngortinneqarnissaa pisariaqassasoq. Ulluinnarni allannguutit annikitsut aamma sunniuteqarsinnaapput. Inerititanik naatitanillu amerlanerusunik toqqaanissaq ajornannginnerulersillugulu akikinnerulersissinnaagutsigu, uagutsinnut aallartiffissaqqissuuvoq tigussaasoq, Brugsenimi pisortaaneq Allan Kristoffersen oqarpoq.
Brugseni peqqissutsimut tunngatillugu arlalinnik suliniuteqareersimavoq. Ukioq manna siusinnerusukkut suliffeqarfiup arfininngornikkut imigassamik tuniniaasarnerup piffissaa allanngortippaa, aggustimilu eqiiallassaatinik koffeinimik annertuumik akulinnik pisinermi 16-inik ukioqalereersimanissamut killiliineq atuutilersinneqarpoq.
Allan Kristoffersenip oqarnera naapertorlugu suliniutit imminnut ataqatigiipput:
– Brugseni ilaasortatsinnit pigineqarpoq, inuiaqatigiinnullu akisussaaffeqarpugut. Kajumissaarerusuppugut peqatigiillutalu peqqinnerulaarnissap ajornannginnerulersinnissaa kissaatigalugu.
– Ulluinnarni nioqqutissanik niueruteqartuuvugut, pisiniartartutsinnullu atugassarititaasunik pilersitsinitsinni akisussaaqataasinnaavugut. Tamatumani pineqarput suut toqqassallugit ajornannginnerulersinnerivut, qanoq akeqartinnerivut, kiisalu nioqqutissanik soorlu imigassanik
eqiiallassaatinillu qanoq tuniniaasarnerput. Anguniagarput paasiuminarluinnarpoq: peqatigiilluta ulluinnarni inuunerput peqqinnerulaalersissinnaavarput.
”Pingasunngornermi peqqinneq” septembarip 23-anni 2026 atuutilissaaq, tamatuma kingorna pingasunngornerit tamaasa Brugsenip pisiniarfiutaani tamani ingerlanneqartassalluni. Inerititat naatitallu nutaat tamarmik 15 procentimik akikillisaavigineqassapput. Akikillisaat ilaasortanut pisiniartartunullu allanut tamanut atuuppoq.
