Qaleralinnik, saarullinnik, nataarnanillu “Neqeroortitsineq 1”-imut Naalakkersuisut pisassiissutigisaannut tunngavilersuutinut akerliunertik tunngavigalugu, Inua Fisheries Greenland ApS inatsisilerituunik ikiortiserinnipput.
Inua Fisheries-ip akerlerinngilaa pisassat allanut tunniunneqarsinnaanerat. Piumasaqataasimasulli tamanit takuneqarsinnaasut avaqqutiinnarlugit tunniussineq pissusissamisoortutut isiginngilaat, ilaatigut makku tunngavigalugit:
• Tunniussinnginnermut tunngavilersuutigineqartut, neqeroortitsinermi piumasaqaataasuni tunngavilersuisuusussat nassaarineqarsinnaanngillat soorlu piginnittut qanoq amerlatiginersut.
• 2025-mi neqeroortitsinermi unitsitsinermut tunngavilersuutigineqartut, 2026-milu tunngavilersuutigineqartut, ilaatigut “ammasumik ingerlatsinissap, naligiissitsinerup aalajangernissamullu patajaatsuunissaat” takutinneqanngilaq. Tassani ammasumik ingerlatsinissaq tunaartaralugu point-ilersuinerit nalilersuinermi ilaatigut atorneqarsimanersut takussutissartaqanngillat.
• Aalajangernermi, ilaatigut suliffeqarfik tunineqartumut “immikkut oqimaalutarineqartutut” tunngavigineqartoq nunap immikkoortuani inuussutissarsiornikkut aalisarnikkullu siuarsaanissaq neqeroortitsinermi ersersinneqarsimanngilaq tamanullu atuutsinneqarani.
• Taamaammat takuneqarsinnaagunarpoq, Narsami suliffissuarmik pilersitsinissamik avammut nalunaaruteqartoqarnera, kingusinnerusukkullu Kommune Kujallermi Borgmesterip allagai tamanut ammasut tunngaviliullugit Naalakkersuisut aalajangersimasut.
Avataani pisassanik pisassiinermi, neqeroortitsinerup piumasaqaataasa avataatigut tunngavilersuutissaqaraanni, kingusinnerusukkullu Narsami suliffissuarmik pilersitsinngikkaanni avataani pisassanik pisassinneqarsimaneq apeqquserneqartariaqarpoq.
Tamannalu tunngavigalugu Neqeroortitsineq 1, juuni 2026-meersumut Inua Fisheries Greenland ApS inatsisilerituut aqqutigalugit, Naalakkersuisunut aalajangernermut akerliunermik imaqartumik allagaqarput.
“Nunatta ataatsimoorussamik pigisaanik nalilinnik ukiuni 10-ni atuinissamut, annertuumillu naleqartunut aaliangerneq annertuujuvoq. Taamaammat pingaaruteqarpoq, taama nalilinnik tunniussinermi, paasinartunik ilisarnaqutinillu ilisimaneqareersunut apeqquserneqarsinnaanngitsunik tunngavilersuisoqarsimassasoq”
Taama oqarpoq Jens Peter Larsen, Inua Fisheries Greenland ApS-imi siulersuisuni siulittaasoq.
