Politikkikkut isumaqatigiissuteqartoqarpoq ullorissap anaata Agpaliliup Kalaallit Nunaannut utertinneqarnissaa pillugu.
Tamanna paasinarsivoq Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Nivi Olsenip, aammalu Danmarkimi ilisimatusarnermut, ilinniartitaanermut digitaliseeriinermullu ministerip, Christina Egelundip akornanni ataatsimeeqatigiinnerisa kingorna.
Ataatsimiinnermi Agpaliliup Kalaallit Nunaannut utertinneqarnissaa oqaluuserineqarpoq, illuatungeriillu ataatsimut anguniagaqarlutik, tassa ullorissap anaa Kalaallit Nunaannut utertinneqassasoq uppernarsarpaat. Utertitsinissamut atatillugu katersugaasiviit marlut (Nunatta Katersugaasivia Allagaateqarfialu aamma Statens Naturhistoriske Museum) akornanni immikkut ilisimasatigut, inatsisitigut allaffissornikkullu sulineq aallartisarneqalereerpoq, maannakkullu utertitsinissamut pisariaqartinneqartunik erseqqissaasoqarluni suliaq ingerlaqqippoq.
Naalakkersuisoq Nivi Olsen-ip politikkikkut tapersersorneqarnini nuannaarutigaa oqarlunilu:
“Agpalilik Kalaallit Nunaannittussaavoq. Taamaattumik nuannaarutigaara politikkikkut isumaqatigiissutigineqarmat ullorissap anaa angerlaqqissasoq. Tamanna Kalaallit Nunaannut kulturikkut oqaluttuarisaanikkullu pingaaruteqartorujussuuvoq, maannakkullu inatsisitigut allaffissornikkullu suliassat naammassineqarnissaat anguniarlugu suliaq ingerlateqqipparput.”
Danmarkimi ilisimatusarnermut, ilinniartitaanermut digitaliseeriinermullu ministeri, Christina Egelund oqarpoq:
Nuannaarpunga suliassaq maanna katersugaasiviit marluusut suleqatigilluarlugit ingerlanneqalereermat. Upperiuarnikuuara ataatsimoorluta pitsaasumik aaqqiissuteqarsinnaassasugut, Agpalilik Kalaallit Nunaannut utertinneqarsinnaaniassammat. Naapertuilluarlunilu pissusissamisoortumik kissaatigineqarpoq kalaallit nammineq nunaanni ullorisissap anaa nunaminni misigisinnaassagaat takusinnaassallugulu. Danmarkip tungaanit Agpaliliup sivisuumik kingullermillu angalanissaata naammassineqarnissaa anguniarlugu ilungersorluta sulissutigissavarput.
Agpalilik Cape York-ip ullorissap anaata ilaannut ilaavoq, aammalu Kalaallit Nunaata avannaani nassaarineqarsimalluni. Ullumikkut Danmarkimiippoq, taamaattumillu utertinneqarnissaa Kalaallit Nunaata pinngortitamut kulturikkullu kingornussaannut nunatsinniilerseqqinnissamut suliaqarnermut pingaaruteqartumik alloriarnerussaaq.
Ataatsimiinneq suleqatigiinnermik pitsaasumik aammalu suliaq pillugu ataatsimoorussamik paaseqatigiinnermik tunngaveqarpoq. Illuatungeriit isumaqatigiissutigaat suleriaqqinnissami suleqatigiinnertik ingerlateqqissallallugu.
“Pingaarnerpaavoq maanna ataatsimoortumik politikkikkut sammivik anguniagarlu pillugu isumaqatigiissuteqaratta. Suleqatigiinnerup ingerlaqqinnissaa qilanaaraara, taamaalilluni Agpalilik Kalaallit Nunaannut angerlaqqissinnaaqqullugu,” Nivi Olsen oqarpoq.
Naalakkersuisut utertitsinermut atatillugu piffissaliussaq erseqqinnerusoq pigineqalerpat paasissutisseeqqikkumaarput.
