Naleraq siunnersuuteqarpoq Inatsisartuni immikkut ittumik ataatsimiittoqarnissaanik, ukiakkut ataatsimiinneq ullormik ataatsimik sioqqullugu.
Naalakkersuisut tallimanngornermi spiralilersuisoqarsimanermut suliami inuit pisinnaatitaaffiinut tunngasortaannik nalunaarusiaq saqqummiummassuk Naleraq malinnaassimavoq. Sammisaq taama imaannaanngitsigisoq pillugu Naleraq Inatsisartuni immikkut ittumik ataatsimiittoqarnissaanut Naalakkersuisunut Inatsisartunilu partiinut tamanut assammik isaasserusuppoq.
»Sammisaq taama imaannaanngitsigimmat Naalakkersuisunut partiinullu tamanut assammik isaassivugut. Pisimasut qanoq naliliiffigineqarnissaat nunatta avataaniit aalajangiiffigineqassanngilaq sunnerneqassananilu,« siulittaasoq Pele Broberg oqarpoq.
Naleraq siunnersuuteqarpoq immikkut ittumik ataatsimiinneq ukiakkut ataatsimiinneq ullormik ataatsimik sioqqullugu ingerlanneqarsinnaasoq. Ataatsimiinnermi qulequtarineqarsinnaavoq: »Inuiaat Kalaallit nungusarneqarsimappat?«
Ataatsimiinnermi sammineqassapput nunasiaataanerup nalaaniit maannamut iliuuserineqarsimasut, kiisalu Inatsisartuni partiit qanoq ingerlariaqqikkusunnertik pillugu isummersussapput.
Sammisaq siunissamut pingaaruteqarmat, Naleraq siunnersuuteqarpoq Naalakkersuisut nalunaarusiamik saqqummiussereerpata Inatsisartuni partiit oqaaseqartartui piffissamik killiligaanatik oqaaseqarsinnaassasut. Aammattaaq partiit qasseriarlutik apeqquteqarsinnaanerat killilerneqassanngilaq.
»Partiit oqaatigerusutatik tamaasa oqaatigisinnaasariaqarpaat. Suut tamarmik ammasumik eqqartorneqarnissaat anguniarlugu assammik isaassivugut,« Pele Broberg oqarpoq.
Naalakkersuisut aamma apeqquteqarusukkunik, Naleraq partiit akunnerminni apeqquteqarsinnaanissaannut ammaavoq.
