Meeqqat Pisinnaatitaaffii pillugit Sullivimmi, MIOmi peqquserluttoranik aamma aningaasanik atornerluinermut pasitsaassisoqarnerani Inuit Ataqatigiit pisortat aningaasaataasa aqunneqarnerannut ersarinnerusunik maleruagassaqalernissaq piumasaqaatigaat – piaarnerpaamillu FN-ip ileqqorlunnermut isumaqatigiissutaanut ilanngunneq aamma piumasarineqarluni. Tamanna Nivi Rosing-ip, Inuit Ataqatigiit sinnerlugit Inatsisartuni ilaasortaq, tusagassiutini apersorneqarnerani takuneqarsinnaavoq.
Suliaq pisortat aningaasaataannut, meeqqanut illersuinermut, pisinnaatitaaffiisa isumannaarnissaannut aamma nipaasa tusaaneqarnissaannut atugassatut aningaasaliissutigineqarsimasunut, tunngassuteqarpoq. Pasitsaassinerlu peqqutaalluni partiimi ernumasoqarpoq.
»MIOmi aningaasanik atornerluisoqarsimaneranikaamma peqquserluttoqarsimaneranik pasitsaassisoqarnera atuarlugu alianarlunilu ernumanarpoq,« taamak Nivi Rosing oqaaseqarpoq.
Ersarissunik sinaakkutaqarnissamut ujartuisoq
Nivi Rosing malillugu suliaq annertunerusumik ajornartorsiuteqarpoq: pisortat aningaasaataannit aningaasaliinerni politikkikkut aqutsinissami naammanngitsunik sinaakkutaqarneq atornerlunnissaannullu periarfissaqarneq.
»Assingusumik pisoqaqqinnginnissaa anguniarlugu sinaakkutat ersarissut atuutsilertariaqarpagut,« taamak oqaaseqarpoq.
Inuit Ataqatigiit arlaleriarlutik Inatsisartunut siunnersuuteqarnikuupput, tassani Kalaallit Nunaat FN-ip peqquserlunnerit akiorniarlugit ileqqorlunnermut aninguinissaq pillugu isumaqatigiissutaanut ilaatinneqalernissamut siunnersuuteqarnikuullutik. Siunnersuut qinersiffiusup siuliani siullermeerluni saqqummiunneqarsimavoq, sulili piviusunngortinneqarsimanani, taamaattumik partiip 2026-mi Inatsisartut upernaakkut ataatsimeersuarneranni siunnersuutigeqqissimallugu.
»Suliaq kinguartinneqaqqissinnaanngilaq,« tamanna Nivi Rosingip ersarissarpaa, tassani nunatsinni peqquserluttarneq akiorniarlugu inatsit iluarsartuunneqartariaqarneranik isumaqarmat: »Suliaq erngertumik suliarineqassaaq.«
