Ataasinngorneq aggustip 17-iat 2026 aallarnerfigalugu pisiniartartut ilaasortallu Brugsenip pisiniarfiini eqiiallassaatinik koffeinimik annertuumik akulinnik pisissagunik 16-inik ukioqalereersimasassapput. Suliniut aqqutigalugu Brugseni eqiiallassaatinik tuniniaaneq eqqarsaatigalugu Kalaallit Nunaanni meeqqanut inuusuttunullu peqqinnarnerusumik atugassaqartitsinissamut eqeersimaartumik akisussaaqataarusuppoq.
Brugseni ukiuni arlalinni meeqqat inuusuttullu eqiiallassaatinik pisinissamut periarfissaannik killilersuiniarluni suliaqarsimavoq, ilaatigut piffissami atuarfiup nalaani najukkani suliniuteqarnikkut. Ukiunut killiliineq nutaaq atulersillugu Brugseni suliniummik ingerlatseqqippoq, pisiniarfinnilu tamani malittarisassaq ataasiusoq atuutilersillugu.
Aalajangiineq meeqqat inuusuttullu koffeinimik atuinerisa killilersorneqarnissaanik peqqinnissatigut innersuussutinik tunngaveqarpoq. Fødevarestyrelsenimit meeqqat eqiiallassaatinik imernissaat innersuussutigineqanngilaq, koffeini annertuallaartoq ilaatigut eqqissiviilliornermik, sininniarnermik ajornartorsiuteqarnermik, ukkassiniarnermik ajornartorsiuteqarnermik uummatillu tillerulunneranik kinguneqarsinnaammat. Nunani avannarlerni Europamilu nunani arlalinni misilittakkat aamma takutippaat ukiunut killiliineq meeqqat inuusuttullu eqiiallassaatinik pisinissamut periarfissaannik killiliissutaasinnaasoq.
Brugseni Kalaallit Nunaanni pisiniarfinnik nioqquteqarfiit annerit ilaattut peqqinnartunik toqqaanissap ajornannginnerulernissaanik kissaateqarpoq, pingaartumik meeqqat inuusuttullu angajoqqaatik ilaginagit namminneerlutik pisiniaraangata.
– Nalunngilarput eqiiallassaatit koffeinimik annertuumik akullit meeqqanut innersuussutigineqanngitsut. Taamaattumik peqqinnarnerusumik atugassaqartitsinermut tapersiiumavugut, inuusuttullu angajoqqaatik ilaginagit pisiniaraangamik ulluinnarni peqqinnarnerulersitsisunik nioqqutissanik pisinissaannut kajumissaarnerorusuppavut. Ukiunut killiliineq kisimiilluni unammillernartoq aaqqinngilaa, meeqqanulli inuusuttunullu peqqinnarnerusumik atugassaqartitsinissamut tigussaasumik tapersiutaavoq, Brugsenimi pisortaaneq Allan Kristoffersen oqarpoq.
Atuarfiit aallartinneranni atuutilissaaq
Ukiunut killiliineq ataasinngornermi aggustip 17-ianni 2026 atuutilissaaq, taamanikkullu meeqqat inuusuttullu amerlasuut aasaanerani atuanngiffeqareerlutik atuarfimmut utersimassallutik.
Ulloq taanna toqqarneqarpoq meeqqat inuusuttullu ulluinnarni, amerlanertigut angajoqqaatik ilaginagit pisiniaraangamik, nioqqutissanik neqeroorutinillu naapitaannik annertunerusumik ukkataqartoqarnissaa anguniarlugu. Peqatigisaanik Brugseni neriuuteqarpoq suliniut ileqqunik peqqinnartunik akisussaassuseqartumillu atuinermik oqaloqatigiinnermut pilersitseqataassasoq.
Aaqqissuussineq imaappoq
Ukiunut killiliineq atuutilerpat, sulisut pisiniartartoq 16-inik ukioqalereersimanersoq qularigunikku ukiuinik uppernarsaaqqusisiinnaapput.
Ukiunut killiliineq Brugsenip nammineq kajumissutsiminik aalajangigaraa, inatsisitigullu piumasaqaataanngilaq. Eqiiallatsaatit koffeinimik annertuumik akullit pineqarput, imeruersaatilli nalinginnaasut soorlu sodavandit saftillu pineqanngillat.
Brugsenimit neriuutigaarput pisiniartutta ilaasortattalu suliniut pitsaasumik tigussagaat, sulisullu pisiniarfinni ukiunut killiliinermik atuutsitsisussat paasinnittumik pissuserissaarfigineqarumaartut
