Umiarsuit takornariartaatit kangerloqarfiit ilaannik angallaviginnittarnerat, najukkami innuttaasunut aammalu pinngortitami sumiiffinnut pineqartunut ilungersunartutut misigineqartarnera pillugu saaffiginnissutinik Naalakkersuisut tigusaqartarsimapput.
Uumasoqassutsimut sunniinermik, nipiliornernik akornusersuinernik kiisalu sumiiffit qasuerserfittut sukisaarsaarfittullu attanneqarnissaannik allanngutsaaliuinissamillu kissaatinik, saaffiginnissutit ilaatigut imaqarput.
Angalanermi ornitassatut Kalaallit Nunaannut soqutiginninnerup alliartornera Naalakkersuisunit pitsaasumik isigineqarpoq, umiarsuarnillu takornariaqarnerup takornariartitsinermik inuussutissarsiornerup ineriartorneranut annertuumik iluaqusiinera nassuerutigineqarluni. Takornariaqarneq najukkami inuiaqataasunut ingerlatanik kaaviiaartitanillu pilersitsisarpoq illoqarfinni aammalu inoqarfinni suliffissaqartitsiniarnermut aamma inuussutissarsiornermut ikorfartuisarluni.
Tamatumunnga peqatigitillugu, takornariartitsinerup ineriartortinneqarnera piujuartitsinermik tunngavilimmik aammalu najukkami innuttaasunut, pinngortitamut aamma uumasoqassutsimut ataqqinnittumik ingerlanneqarnissaa Naalakkersuisunit pingaartinneqarpoq. Inuussutissarsiorneq eqqarsaatigalugu aammalu Kalaallit Nunaata pinngortitaanik- aamma kulturikkut naleqartitanik illersuineq eqqarsaatigaugu siunertamut naapertuuttumik oqimaaqatigiissaarisoqartuarnissamik, akisussaassuseqartumillu takornariaqarnermik ineriartortitsineq piumasaqaateqarfiuvoq.
Tamanna tunuliaqutaralugu, kangerloqarfinni umiarsuarnik takornariartaatinik angallannerup sapinngisamik pinaveersaartinneqarnissaa imaluunniit killilersugaanissaa, Naalakkersuisunit innersuussutaavoq. Pinngortitamik sumiiffinnik aamma uumasoqassutsinik qajannartunik sunniinissat killilersimaarnissaq kiisalu sumiiffiit qasuerserfittut sukisaarsaarfittullu naleqartinneqarnerinik ataannartitsinissaq aammalu piniarnermik aalisarnermillu periarfissat pillugit najukkami innuttaasunit kissaatigineqartunik ilaliinissaq, innersuussummi siunertaavoq.
Pilersaarusiorluarneq, oqaloqatigiilluarneq aamma najukkami pissutsinik eqqarsaatiginninneq aqqutigalugit aammalu akisussaassuseqartumik aamma Kalaallit Nunaanni umiarsuarnik takornariaqarnermik ineriartortitsinerup piujuartitsisumik ineriartortinnissaanut peqataajuarnissamut innersuussummik malinneqqullugit, takoriartitsinermik umiarsuaatillit, umiarsuit naalagaat aammalu umiarsuarnik takornariartitsinermik inuussutissarsiornermi peqataasut allat, Naalakkersuisunit kajumissaarneqarput.
Tamatuma saniatigut takornariartitsinermut inatsit naapertorlugu nunap ilaani immikkoortitani (zonenut immikkoortortani) killilersuinernik sulianik Naalakkersuisut aamma kommunit ingerlataqarmata ilisimatitsissutigineqarsinnaavoq. Sumiiffiit sorliit umiarsuarnik takornarianut ammanersut aammalu sumiiffiit sorliit killilersuinernut ilaatinneqarumaarnersut, nunap ilaani zonenut immikkoortiterinerup erseqqissassavaa. Najukkami innuttaasut, inuussutissarsiortut soqutigisallillu allat suleqatigalugit killilersuinerit suliarineqassapput tamanullu tusarniaasoqareernerata kingorna atuutilersinneqassallutik.
