Kalaallit ilinniartut 2027-2028-mi Tuluit Nunaanni universitetini masterinngorniarlutik ilinniarnissamut Chevening-stipendiamut maanna qinnuteqarsinnaalerput.
Periarfissaq manna Ilinniartitaanermut, Kultureqarnermut, Timersornermut Ilageeqarnermullu Naalakkersuisup Nivi Olsenip aamma Tuluit Nunaata Danmarkimut ambassadøriata Victoria Elizabeth Billingip 20. maaji 2026-mi suleqatigiinnissamik isumaqatigiissummik oqaluttuarisaanermut pingaarutilimmik atsioqatigiinnerisa malitsigaa.
Isumaqatigiissut Kalaallit Nunaanni bacheloritut ilinniakkaminnik naammassinnissimasut Tuluit Nunaata Chevening-stipendianut qinnuteqarnissaannut periarfissiivoq. Tamatuma peqatigisaanik Kalaallit Nunaata Tuluit Nunaatalu akornanni ilinniartitaanikkut sivisuumik suleqatigiinnerup aallartinnera malunnartinneqarpoq.
“Qinnuteqartoqarsinnaalermat nuannaarutigaara. Kalaallit bacheloritut ilinniakkaminnik naammassinnissimasut Tuluit Nunaanni universitetit pitsaanersaasa ilaanni ilinniagaqaqqinnissamut, kiisalu nunat tamalaat akornanni attaveqaatinik pilersitsinissamut periarfissaq immikkut ittoq maanna atorluarsinnaavaat. Neriuppunga amerlasuut qinnuteqassasut, kingornalu ilisimasatik misilittakkatillu nutaat Kalaallit Nunaata ineriartortinneqarneranut iluaqutaasumik atussagaat,” Naalakkersuisoq Nivi Olsen oqarpoq.
Chevening Tuluit Nunaata nunat tamalaat akornanni pisortatigoortumik stipendiaqartitsisarneranut aaqqissuussaavoq. Aaqqissuussaq Tuluit Nunaata Nunanut Allanut Ministereqarfianit suleqatigisaannillu aningaasalersorneqarpoq. Siunissami aqutsisunngorsinnaasunut Tuluit Nunaanni ilinniaqqinnissamut kiisalu nunarsuaq tamakkerlugu immikkut ilisimasallit aalajangiisartullu attaveqaqatigiiffiannut ilanngunnissamut periarfissiivoq.
Stipendiat inunnut nunaminni pitsaasumik ataavartumillu allanngueqataarusuttunut sammitinneqarput. Kalaallit Nunaannut stipendiamut qinnuteqartut ilaatigut Kalaallit Nunaanni najugaqartuussapput Cheveningillu qinnuteqartunut piumasaqaataanik allanik naammassinnissallutik.
Qinnuteqarnissamut killigititaq: 6. oktobari 2026 nal. 11.00 UTC.
