Naalakkersuisut sanaqateqarluni illuliornissamut taarsigassarsisarneq pillugu Inatsisartut inatsisissaattut siunnersuut tamanut ammasumik tusarniaassutigalugu nassiuppaat.
Siunnersuut atorlugu 2026-mi aningaasanut inatsisip suliarineqarnerani sanaqateqarluni illuliortarnermut aqutsinerup aningaasalersuisarnerullu kommuniniit Naalakkersuisunut nuunneqarnissaata aalajangiunneqarnera malitseqartinneqassaaq.
Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq oqarpoq:
“Sanaqateqarluni illuliortarneq ukiorpassuarni nunaqarfinnut illoqarfinnullu minnerusunut nunassittarnermut inissianillu pilersuinermut tapertaalluni pingaarutilittut sakkugineqarsimavoq. Aaqqissuussineq taanna Naalakkersuisut ingerlateqqissallugu ineriartortissallugulu kissaatigaat. Siunnersuummi maleruagassat Inatsisartut inatsisaannut ataatsimut katersorpagut, taamaalillutalu nuna tamakkerlugu aaqqissuussinermik pisariitsumik assigiiaartumillu pilersitsilluta. Tamatuma peqatigisaanik aaqqissuussineq eqaanneruvoq, taamaalillunilu innuttaasut najugarerusutaminni suliffigerusutaminnilu inississinnaanerat ajornannginnerulissaaq.”
Siunnersuutip nassatarisaanik ilaatigut:
• Naalakkersuisut siunissami sanaqateqarluni illuliornissamut taarsigassarsititsisalissapput taarsigassarsianillu aqutsilissallutik,
• innuttaasut inoqarfimmut nuunnginnerminni sumiiffimmut atassuteqarnerminnik uppernarsaareernerminni sanaqateqarluni illuliamik sananissamut pisinissamulluunniit taarsigassarsitinneqarnissamik qinnuteqarsinnaalissapput,
• ilinniakkaminnik naammassinneqqammersut ukiuni akileraarfiusuni kingullerni tallimani ilinniarnertik pissutigalugu inuussutissarsiorsimanngikkaluarunilluunniit aaqqissuussinermik atuisinnaalissapput,
• taarsigassarsiani nutaani kommunit piffissani pilersaarutaasuni aserfallatsaaliuinissamut iluarsaassinissamullu taarsigassarsinissamut tapiiffigineqarnissamullu aaqqissuussinerat ingerlateqqinneqassanngilaq, aamma
• maleruagassat Inatsisartut inatsisaannut ataatsimut katersuunneqassapput nutarterneqassallutillu.
Tusarniaanermi akissuteqarnissamut 28. aggusti 2026, nal. 12.00 killiliunneqarpoq. Piffissap tusarniaaffiusup, nalinginnaasumik sapaatit akunnerinik sisamanik sivisussuseqartartup sapaatit akunnerinut arfinilinnut sivitsorneqarnerani, tusarniaanerup piffissami sulinngiffeqarfiusumi ingerlanneqarnissaa eqqarsaatigineqarpoq.
