Ulloq 1. november Jeppe Jensen sulilerpat aammalu Jens Lauridsen kingoraarlugu suliassaq tiguppagu Greenland Airports allamik pisortaanertaassaaq.
Atorfinitsitsinermi Greenland Airports-ip immikkoortumi nutaami aallartinnera peqatigisaanik malunnartinneqarpoq. Nuummi Qaqortumilu mittarfiit nutaat pilersinneqareerneranni kiisalu Ilulissani nunanit tamalaanit mittarfiup ammarneqarnissaani pisussami ukkassineq sanaartornermiit ingerlatsinermut, ineriartortitsinermut aningaasarsiortitsinermullu nuutinneqartussaavoq.
Ukiuni aggersuni suliassaalissapput aalajaatsumik isumannaatsumillu ingerlatsinerup qulakkeernissaa, mittarfiit ineriartortinneqarnerisa ingerlateqqinnissaa aammalu angalasunut, inuussutissarsiortunut inuiaqatigiinnullu kalaallinut sapinngisamik annertunerpaamik naleqalersitsinissaq.
Alloriarnerup tullia pissusissamisoortoq
Siulersuisunut siulittaasup Jens Willumsen-ip Jeppe Jensen immikkoortup tulliani aqutsisussatut eqqortutut isigaa.
“Greenland Airports pissusissamisoortumik allanngortitsisussanngorpoq. Ukiuni kingullerni mittarfiit nutaat pilersinneqarnissaat sammineqarsimavoq, ukiuni aggersuni isumannaatsumik ingerlatsinikkut, ineriartortitsinerup ingerlateqqinneratigut tikikkuminarnerulersitsinikkullu taakkua periarfissaqarfiisa atorneqalernissaat sammineqartussanngorluni. Suliassaq taanna allaavoq, taamaattumillu aqutsisussaq eqqortunik misilittagalik eqqortunillu piginnaasalik immikkoortumi tassani siuttunngortussaq ujartorsimavarput.”
Peqatigisaanik piffissaq iluatsillugu Jens Lauridsen Greenland Airports-ip suliffeqarfiup ullumikkut inissisimaneranut inissitsillugu suliaqarsimaneranut immikkut qutsavigaa.
“Jeppe attaveqaasersuutinik inuiaqatigiinni pisariaqartinneqartunik aammalu aaqqissuussaanerni annertuuni aqutsinermik annertoorujussuarnik misilittagaqarpoq. Peqatigisaanik annertuumik niuernermik paasisimasaqarpoq, atorluarusutatsinnik. Naatsumik oqaatigalugu ilisarnaatai Greenland Airports-ip suliffeqarfittut inuiaqatigiinni pisariaqartinneqartutut, Kalaallit Nunaat tamakkerlugu periarfissanik suli amerlanerusunik ammaassisussatut, ineriartortinnerani immikkoortup tullianut tulluaqqissaarput.
Peqatigisaanik piffissaq iluatsillugu Jens Lauridsen annertoorujussuarmik suliaqarsimaneranut qutsavigerusuppara. Mittarfinnik nutaanik pingasunik sananissamut suliassatut aallartittoq, piffissap ingerlanerani Kalaallit Airports-ip aamma Mittarfeqarfiit ullumi ilisimasatsinnut Greenland Airports-inngorlugu kattunneqarnerat ilaatilerlugu ineriartorsimavoq kiisalu sanaartornermiit ingerlatsinermut ineriartorsimalluni. Tamanna Jensip annertuumik tunniusimalluni siuttuuffigisimavaa, suliaqarnerlu taanna toqqammavissaliivoq, tamannalu Jeppe-p maannakkut inerisaqqittussanngorpaa.”
Jeppe Jensen KNI A/S-imi pisortaanertut atorfimminngaaneerpoq aammalu siusinnerusukkut Mittarfeqarfinni qullersaqarfimmi pisortaniissimalluni kiisalu Tusass-imi aqutsisutut atorfeqarsimalluni.
Takoqqillugu nuannerpoq
Sulisut arlallit Jeppe Jensen aatsaat siullermeertumik suleqatigilissanngilaat.
Pisortap misilittagallip Niels Grosen-ip Jeppe Mittarfeqarfinni suleqatigisimavaa aammalu Greenland Airports-imut maannakkut utertussanngormat qilanaaralugu.
”Jeppe uternerani tikilluaqqunissaanut qilanaarpunga. Aqutsisuuvoq inunnik naligalugit naapitsisartoq aammalu suliassanut inunnullu suliarinnittunut ilumoortumik soqutiginnittartoq.”
Jeppe mittarfiit ilisimaarigai aammalu inuussutissarsiutip avataani iluatinnaatilinnik misilittagaqalersimasoq, peqatigisaanik Nielsip tikkuarpai.
“Jeppe KNI-miit nutaanik isiginnittaaseqarluni utertussanngorpoq, peqatigisaanillu mittarfinnut najukkanilu pissutsinut annertuumik paasisimasaqarluni. Taakkua ataqatigiissillugit Greenland Airports-imut annertuumik nukittoqutaalertussaapput.”
Uteqqinnissaminut qilanaarpoq
Pingaartumik Greenland Airports-ip inuiaqatigiinni inissisimanera, Jeppe Jensen-ip akuersiniarluni aalajangerneranut pissusissamisoortunngortitsivoq.
”Suliffeqarnera tamaat suliffeqarfinni inuiaqatigiinnut kalaallinut suliassanik pingaarutilinnik suliaqartuni sulinissaq kajumigisimavara. Tamanna aamma Greenland Airports-imut atuuppoq. Silaannakkut angallanneq inuiat naapissinnaanissaannut, suliffeqarfiit ineriartornissaannut aammalu nunatta ataqatigiissinnaassuseqarnerata qulakkeernissaanut pisariaqarpoq. Suliassap taassuma sulisut suleqatigisartakkallu peqatigalugit suliarinissaanut qilanaartorujussuuvunga.”
Ilulissani Mittarfiup ammarnissaa pisussaq aamma immikkut pingaaruteqalertussaavoq.
“Ilulissani inunngorpunga peroriartorlungalu, taamaattumik nunanit tamalaanit mittarfittaassap tassani ammarneranut peqataanissaq soorunami immikkuullarilluinnartussaavoq. Kisianni siullermik pingaarnertullu illoqarfimmut aammalu Kalaallit Nunaat tamakkerlugu ulloq pingaaruteqartorujussuusussaavoq. Mittarfiit nutaat aammalu pioreersut siunissami ukiorpassuarni Kalaallit Nunaat tamakkerlugu iluaqutaanissaannut qulakkeereqataanissara qilanaaraara.”
Jeppe Jensen Ilulissani Mittarfiup ulloq 29. oktober ammarnerani peqataassaaq aammalu ulloq 1. november pisortaanertut pisortatigoortumik sulilertussaalluni.
