Naalakkersuisut siunnersuisarfik Rambøll-imut Ittoqqortoormiini umiarsualivimmik alliliisinnaanermi pisariaqartitanik misissueqqissaarnissaq pillugu isumaqatigiissuteqarput. Isumaqatigiissut siunissami Kalaallit Nunaata kangiani umiarsualivinni attaveqaasersuutinut aningaasaliinissaq pillugu aalajangiinissamut tunngavissamik pilersitsinissamut alloriarneruvoq pingaarutilik.
Attaveqaasersuutinut, Ineqarnermut, Isorliunerusunut Upalungaarsimanermullu Naalakkersuisup Iddimanngiiu Jensen Bianco-p suliap immikkoortumut nutaamut ikaarsaarsinnaalernera nuannaarutigaa.
“Ittoqqortoormiini innuttaasut piffissami sivitsortumi umiarsualivimmi pissutsit pitsaanerulernissaannik piumasaqarsimapput. Rambøll-imut isumaqatigiissuteqarnitsigut kissaatiniit takorluukkaniillu aalajangersimasumik pilersaarusiornissamut pingaarutilimmik alloriarpugut. Pisariaqartitanik misissueqqissaartoqarneratigut paasissutissanik tunngaveqarluta eqqortunik aalajangiinissarput, taamaalillunilu umiarsualivik pillugu aaqqiissutissat illoqarfimmi nunallu immikkoortuani pisariaqartitaviusunut naleqqussarneqarnissaat qulakkeertussanngorparput.”
Pisariaqartitanik misissueqqissaarnermi ilaatigut umiarsualiviup siunissami suliassai, piginnaasatut pisariaqartitassai aamma aaqqiissutissatut periarfissat misissorneqassapput. Suliami paasissutissat pioreersut katersorneqassapput, soqutigisaqartut attuumassutillit oqaloqatigineqassapput, kiisalu umiarsualiviup ineriartorfigisinnaasai assigiinngitsut naliliiffigineqassapput. Misissueqqissaarnermi pilersuinermi isumannaassutsimut, inuussutissarsiutinik ineriartortitsinermut, aalisarnermut, upalungaarsimanermut, ilaasunik angallassinermut tikikkuminassutsimullu tunngassuteqartut misissuiffigineqassapput.
Rambøll-ip suliap ingerlanerani qitiusumik sullissisut arlallit, taakkununngalu innuttaasut najugaqartut, aalisartut, Kommuneqarfik Sermersooq, Royal Arctic Line, Royal Greenland, Air Greenland, KNI aamma Illersornissaqarfik ilanngullugit akuutinniarpai. Najukkami misilittakkat pisariaqartitallu aalajangiinissamut tunngavissanut ilaatinneqarnissaasa qulakkeerneqarnissaa siunertarineqarpoq.
Naalakkersuisup Iddimanngiiu Jensen Bianco-p oqarnera malillugu misissueqqissaarnermi pisussami siunissami umiarsualivissaq qanoq ililluni najukkami inuiaqatigiit ineriartornerannut pitsaanerpaamik tapersiisinnaanersoq pillugu ersarissaanissaq pingaaruteqarpoq:
“Ittoqqortoormiini innuttaasut Kalaallit Nunaanni avinngarusimanerpaat ilaanni najugaqarput, aammalu assartuussinermi pilersuinermilu periarfissat pitsaasut nunassittarnermut, inuussutissarsiutinik ineriartortitsinermut inuunerullu pitsaasuunissaanut aalajangiisuussarput. Taamaattumik pisariaqartitanik qulaajaanitsinni peqqissaartumik tunngavissalimmillu sulinissarput, taamaalillutalu siunissami aningaasaliisarnissamut tunngavissanik pitsaanerpaanik pilersitsinissarput pingaaruteqarpoq.“
Rambøll-ip 2026-mi aasakkut misissueqqissaarnermik ingerlatsilluni, Naalakkersuisup misissueqqissaarnermik ukiakkut ataatsimiinnermi Inatsisartunut saqqummiussisinnaanissaanut piffissaagallartillugu nalunaarusiamik tamakkiisumik tunniussisinnaanissani naatsorsuutigaa. Nalunaarusiaq ilaatigut pisariaqartitat, pisinnaasat suliassallu pillugit misissueqqissaarnermik, kiisalu siunissami umiarsualivissamut aaqqiissutissanut tunngavissanik pingaarnernik assigiinngitsunik imaqassaaq.
“Isumaqatigiissusiorneq maanna Ittoqqortoormiini umiarsualivimmik ineriartortitsinissaq pillugu suliap siumut aallariarneranik isumaqarpoq. Naalakkersuisuni misissueqqissaarnerup inernerinik tigusaqarnissatsinnut, aammalu sumiiffimmi attaveqaasersuutit ineriartornissamullu periarfissat qanoq iliorluta pitsaanerpaamik nukittorsarnissaat pillugu oqaloqatigiinnerup ingerlaqqinnissaanut qilanaarpugut”, Naalakkersuisoq Iddimanngiiu Jensen Bianco naggasiivoq.
