Nunatsinni asimiilluni takornariartitsineq siunniunneqassaaq. Visit Greenland aammalu Visit Nuuk siunniussaqarput. Arpanneq, takornariartitsiutigaluni arpannerlu nunani tamalaani ingerlalluarneqariartuinnarpoq. Nunatsinnilu suliffeqarfik nutaaq-Assut Adventures, internationaliusumik peqataatitsinissaminut siullermeerluni 1. August ingerlassuaa Nuuk Five Peaks.
1. August Nuuk Five Peaks Mountain Challenge ingerlanneqassaaq siullermeerluni nunakkut arpannerulluni, Nuummi illoqarfiup qanittuani qaqqat tallimat: Quassussuaq, Ukkusissaq, Isikkivik Kuanninnguillu qaavat. 25km-inik isorartutigaaq, 2000meterisut portutigaluni, arpattunut naleqqussagaalluni. Pisukkusuttut Nuuk Trail 10K toqqarsinnaavaat, 10km-inik takitigisoq, 700meterinillu katillugu portugisoq.
Nunatsinni arpatsitsinerit ingerlalluarneqartarput. Nuuk Five Peaks-ili siullersaavoq UTMB Index-italik. Tassa nunat tamalaat peqataaffigisartagaanni nalunaarsorneqartartoq. Aaqqissuisut siunniuppaat arpanneq avataaniit tikittunut peqataaffigisassanngortikkusullugu, ukiut tulliuttuni. Suliffeqarfimmi piginnittut nunakkut arpattartuupput misilittagallit nunamiinnermi, aaqqissuussanik unammisitsinernik, nunakkullu arpannernik.
“Nunakkut arpanneq internationaliusoq nunatsinni pilersikkusupparput. Nuummiut malugisimassavaat aqqutit nalunaarsoqqasut, pitsanngorsaaniarluta taamaaliorpugut. Arpannerlu misigisaqarfiulluartikkusullugu, unnukkuani nereqatigiinneqassaaq, pinnatsitsinerillu, ”Assut Adventures-imi pingasuni piginneqataasoq Erna Broberg nassuiaavoq.
”Nunani allani arpatsitsinermi misilittakkat malillugit aaqqissuivugut, aaqqissuinerillu ingerlannikuusagut aallaavigalugit, ”Patrick Beck oqaaseqarpoq, nunatsinnilu isorartuumut angusarissaartarnini misilittagaqarfigilluaramigit 1. august aqutsisuussaaq. Nangipporlu:
”Ilisimavarput ukioq siulleq aaqqissueqqaarnerput misilittakkanik ilikkagaqarfigisussaallugu, najukkami qanimut suleqateqalerneq, avammullu ersarinnerulersitsinissaq. Qujanartumik tigulluarneqarpugut, tapersersorneqarluarlutalu: Visit Nuuk, GrønlandsBankens Erhvervsfond, Greenland Brewhouse aammalu Air Greenland aningaasaleeqataapput.
Arpanneq nunatsinni najugaqartunut aamma peqataaffissaavoq
Aaqqissuisut internationalimik ingerlatserusullutik siunnissaqaraluartut, nunatsinneersunik tikilluaqqusipput. Peqataarusukkuit 10km-imut imaluunniit qaqqat tallimat qaqillugit tikilluaqqusaavutit.
