Siumut gruppia ernumassuteqarluni maluginiarpaa Qullissani aatsitassarsiornermik suliniutit pillugit paasissutissat saqqummiunneqartut suli tamanut erseqqissumik ilisimaneqanngimmata. Kommune Qeqertalimmi kommunalbestyrelsi maannamut suliap ingerlanera pillugu pisortatigoortumik sukumiisumik ilisimatinneqarsimanngilaq.
Qullissat Kommune Qeqertalimmut oqaluttuarisaanikkut, kulturikkut inuiaqatigiinnullu immikkut pingaaruteqarluinnarput. Taamaattumik sumiiffimmi aatsitassarsiornermik pilersaarutit, misissuinissat imaluunniit suliniutit allat pillugit kommunalbestyrelsip tamakkiisumik piffissaagallartillugulu paasissutissinneqarnissaa pingaaruteqarluinnarpoq.
Siumut gruppia isumaqarpoq kommuni innuttaasullu soqutigisaat eqqarsaatigalugit paasissutissanik eqqortunik piffissaagallartillugulu pissarsinissaq pisariaqartoq. Tamanna innuttaasut ammasumik paasitinneqarnissaannut kiisalu kommunip susassaqartut akornanni akisussaassuseqartumik peqataasinnaaneranut tunngavissiissaaq.
Taamaattumik Siumut gruppiata Naalakkersuisut kaammattorpaat Qullissani aatsitassarsiornermut atatillugu suliniutit, akuersissutit, misissuinissat kiisalu pilersaarutit pillugit Kommune Qeqertalimmi kommunalbestyrelsi sukumiisumik ilisimatissagaat. Peqatigitillugu Naalakkersuisut qinnuigineqarput innuttaasunik ataatsimiisitsisoqarnissaa kiisalu najukkami innuttaasut, soqutigisaqaqatigiit, kommuni susassaqartullu allat peqataaffigisaannik ammasumik oqaloqatigiittoqarnissaa qulakkeeqqullugu.
Siumut gruppia isumaqarpoq ineriartortitsineq ammasumik, tatiginartumik aammalu innuttaasut najukkamiittut tusarnaarneqarlutik ingerlanneqartariaqartoq. Taamaattumik paasissutissiisarneq pitsaasoq, peqataatitsineq aammalu suleqatigiinneq suliniutip ingerlalluarnissaanut pingaaruteqarluinnarput.
Naggataatigut Siumut gruppiata neriuutigaa Naalakkersuisut kiisalu susassaqartut allat Kommune Qeqertalimmik qanittumik suleqateqarlutik kommunalbestyrelsi innuttaasullu naammaginartumik paasissutissinneqarnissaat qulakkiissagaat. Peqatigisaanillu kissaatigineqarpoq Qullissani aatsitassarsiornermik ineriartortitsineq kommunimut, inuussutissarsiornermut, suliffissanik pilersitsinermut aammalu aningaasarsiornikkut iluaqutaasumik ingerlanneqassasoq, avatangiisit, kulturikkut kingornussat najukkamilu innuttaasut soqutigisaat ataqqillugit.
Inussiarnersumik inuulluaqqusillunga.
Aqqa Samuelsen
Siumut gruppiani siulittaasoq.
