Naalakkersuisup Mariane Paviasen Jensenip, LGBT+-illu peqatigiiffiata Sipineq+-p akornanni ataatsimeeqatigiinneq
Sipineq+-ip suliai, inuillu LGBT+-it Kalaallit Nunaanni atugaat, atugarissaarnerallu eqqartorniarlugit Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisup Sipineq+-imi siulittaasoq, Qillaq Olsen, naapippaa
Nuuk Pride 2026, nunat assigiinngitsut akornanni Sipineq+-p peqataanera kiisalu allatseqarfimmik pilersitsiniarneq ataatsimiinnermi eqqartorneqarput. Taassuma saniatigut Sipineq+-p 2026-mi periusissiorfiusumik suliassatik saqqummiuppai. Taakkua saniatigut inuit LGBT+-it toqqissillutik, atugarissaarlutillu inuusinnaanissaasa pingaaruteqassusaa oqaloqatigiinnermi sammineqarlunilu ukkatarineqarpoq.
”Sipineq+ pitsaasumik, pingaarutilimmillu suliaqarpoq. Ukioq mannalu pride-p qaammataanik naggasiinermut atatillugu, aammalu juunip 13-iani iluatsilluaqqittumik pride-mik aaqqissuussinerini nersorlugit pilluaqquakka. Inuit LGBT+-it immikkoortitsisunik, isumaliutigiinnakkanillu suli nalaatsisarput, tamannalu akiorniassavarput. Tassani Sipineq+ annertuumik allannguereerpoq, taamallu nukittutigisumik piginnaasaqarluartumillu peqatigiiffeqaratta tulluusimaarutigaara. Peqatigiiffilli kisimiissinnaanngilaq, taamaattumik LGBT+-inut tunngatillugu qanoq kivitsisinnaanerput, tamallu atugarissaarnissaat aamma naligiimmik atugassaqarnissaat qanoq qulakkeersinnaaneripput pillugit pitsaasumik oqaloqatigiinnitta nanginnissaanut qilanaarpunga.” taamak oqarpoq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen.
Sipineq+-ip paasissutissiissutigaa, IPPS – Inuit Pisinnaatitaaffii pillugit Siunnersuisoqatigiit aamma Innuttaasut Peqqissusiannik Ilisimatusarfik suleqatigalugit, maani nunami innuttaasut LGBT+-it atugarissaarnerat pillugu qulaajaasussamik nuna tamakkerlugu misissuinermik massakkut ingerlatsilluni.
