Aalisarnermut, Piniarnermut, Nunalerinermut Imminullu Pilersornermut Naalakkersuisup, Peter Borgip, Inuussutissarsiornermut unammilleqatigiissinnaanissamullu Ministeri, Martin Lidegaard, danskit naalakkersuisuinik suleqatigiissutigineqartut pingaarutillit marluk, tassaasut puisinit tunisassianik nunanut allanut nioqqutissiorneq kiisalu umiatsiaaqqanik 6 meterimit mikinerusunik nalunaarsuisarneq, nangillugit suleqatigiissutigineqarnissaat siunertaralugu 24. juni 2026 ataatsimeeqatigaa.
Naalakkersuisut puisinit tunisassiat allat nunanut allanut nioqqutigineqarsinnaanerisa nutaamik periarfissarsiuunniarlugit suliaqarput. Taamaattumik ataatsimiinnermi puisit EU-mit inuussutissatut akuerineqarnissaanik suliap killiffia, Peter Borgimit, qaqilerneqarpoq, taamaasiornikkut puisit amii kisiisa pinnagit avammut nioqquteqartalernissaq anguniarlugu aamma nunat pingajuusunik taaneqartartunut soorlu Norgemut Canadamullu puisinit nioqqutissianik nioqquteqartalernissamik suliaq naalakkersuisuusimasut siuliisa aallartissimasaat malitseqartinniarlugu. Tamanna anguneqarsinnaappat piniartut aningaasarsiorsinnaanerat pitsanngortinneqarsinnaassaaq puisillu pisuussutitut pinngortitameersut atorluarneqarsinnaanerat anguneqarluni.
Aalisariutinik 6 meterimit mikinerusunik (umiatsiaaqqat) nalunaarsuisarnermik suliaq, Imarsiornermut Aqutsisoqarfimmit, suliarineqartoq, Peter Borgimit, Martin Lidegaardimillu, oqallisigineqarportaaq. Suliap killiffia suliallu naammassineqarnissaanut unammilligassat aaqqinneqartariaqartut eqqartorneqarput.
Aalisartut piniartullu nunatsinneersut atugaat pitsanngorsarniarlugit Naalakkersuisut nangillutik sulissapput ilaatigut danskit oqartussaasut suleqatigalugit. Naalakkersuisoqarfiit Aqutsisoqarfiillu akisussaasut piffissami aggersumi suliamik nangitsissapput.
