Air Greenland Illersornissaqarfiup Kalaallit Nunaanni angallassinermik alapernaarsuinermillu suliassaanik avataanit sullissisutut tigusisussatut toqqarneqarpoq. Timmisartut atorneqarsinnaanerat annertusarniarlugu suliassanillu ingerlatsineq nukittorsarniarlugu timmisartut immikkut suliaqarnissamut atortulersukkat marluk attartorneqassapput.
Illersornissamut isumaqatigiissutip 2024-2033-p ataani Issittoq Atlantikullu Avannaa pillugu isumaqatigiissutip immikkoortuanut 1-mut atatillugu, Illersornissaqarfiup Challengerimik timmisartuisa atorunnaarsikkiartornissaat, Illersornissaqarfiullu Issittumi Atlantikullu Avannaani angallassinermik alapernaarsuinermillu suliassaanik avataanit sullissisumik suleqatiginnittoqassasoq aalajangerneqarpoq.
Illersornissamut ministereqarfiup Materiel- og Indkøbsstyrelsea Air Greenlandimik avataanit sullissisutut Illersornissaqarfiup Kalaallit Nunaanni angallassinermik alapernaarsuinermillu suliassaanik tigusisussatut isumaqatigiissuteqarnissamik siunertaqarpoq. Angallassinermi alapernaarsuinermilu timmisartut marluk annertuumik atorneqarsinnaassutsimik malitseqassapput suliassanillu isumaginninnerup nukittuneruneranik kinguneqassallutik. Peqatigisaanik piffissami isumaqatigiissuteqarfiusumi aningaasartuutit annertusineqarput. Timmisartut immikkut orsussanut tankilerneqarlutillu ilaatigut annaassiniarluni suliaqarnermi atugassanik naleqquttunik maluginiutinik alapernaarsuinermillu atortorissaaruserneqassapput.
”Air Greenlandimi Illersornissaqarfiup ilaatigut Kalaallit Nunaanni angallassinermik alapernaarsuinermillu suliassaanik suliarinnittussamik nukittuumik nassaarpugut. Taakku suliassamik isumaginninnissamut pitsaanerpaanik tunngavissaqarput, Air Greenlandimmi piffik tamaanilu silaannaap pissusaa immikkuullarissoq Kalaallit Nunaanni atuuttoq ilisimaaraa. Timmisartunik marlunnik attartornikkut timmisartuut atuussinnaassusaat annertusarneqarpoq, tamannalu suliassanik isumaginninnermi annertuumik pingaaruteqarpoq,” illersornissamut ministeri Jeppe Bruus oqarpoq.
”Illersornissaqarfiup annertusisamik Kalaallit Nunaanni najuunnerani piffimmut iluaqutsiillunilu aallaaveqarnissamik qulakkeerinninnissarput suliassaavoq pingaarutilik. Taamaammat maanna nunatsinni suliffeqarfik suleqatigalugu Kalaallit Nunaanni angallassinermik alapernaarsuinermillu naammassinnissinnaassutsimik nukittorsaanissamik siammasissumik isumaqatigiissuteqarnerput nuannaarutigaara. Nunatsinni Illersornissaqarfiup suliassanik isumaginninneranut akisusaaqataanermik kivitseqataallutalu suleqataanissarput Naalakkersuisut pingaartippaat. Air Greenlandimit naleqqunnerusumik suliassamik ingerlatsisinnaasumik takorluugaqaruminaappoq,” Nunanut allanut, Inuussutissarsiornermut, Aatsitassanullu Naalakkersuisoq Múte B. Egede oqarpoq.
”Air Greenland Kalaallit Nunaanni pissutsini immikkuullarissuni ilungersunartunilu ingerlatsinermi annertuumik misilittagaqarpoq. Taamaammat Illersornissaqarfiup Issittumi Atlantikullu Avannaani alapernaarsuinermik annaassiniarnermillu suliassanut isumaginninnitsinnut atatillugu nukittorsaasinnaasunik inuinnaat sullissinerannut naammassinnissinnaassutsimik suli ataatsimik ilassusiinera nuannarutigisassaavoq,” Issittumi Sakkutooqarfimmi pisortaq Søren Andersen oqarpoq.
Isumaqatigiissummi Finansudvalgip suliassamik akuersinissaa tunngavissaatinneqarpoq, piffissamilu 2028-2037 katillugit 1,6 mia. kr-nik atuisoqarnissaanik malitseqarluni.
