Edna Lyberth, Kalaallit Nunaanni aalisarnermi teknologi atorlugu diplomingeniøritut ilinniakkaminik siullersaalluni ullumikkut ulloq 19. juni 2026 naammassinnippoq. Edna Sisimiuni Danmarkimilu DTU Aquami ilinniarpoq.
Misilitsinneq nalliuttorsiutiginninnerlu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi pipput, Edna ilinniartuunermini tamaani suliffimmi misiliivoq ilinniartuunermilu nalaani ikiortitut sulilluni. Ednap diplomingeniøritut suliniutini Naalakkersuisoqarfik peqatigalugu allaaseraa, taannalu PNNP-p (Pisassiissutit Niuerutigineqarsinnaasut Nammineq Pigisat) aqutsiveqarfimmi 47-mi; Qeqertarsuup Tunuani, Uummannami aamma Upernavimmi umiatsiaararsortunut atuutilersinneqarneranut tunngasuuvoq aamma Naalakkersuisoqarfik peqatigalugu immikkut pikkorissaaneq ataaseq ilinniarnermini naggaserlugu suliaraa.
Edna aalisarnermi ingeniøritut ilinniakkamik kalaallinit siullersaalluni naammassinnippoq, ilinniarnermini ilaatigut Sisimiuni Hirtshalsimilu atuarpoq. Ilinniarnermi uumassusilerineq, teknologi atorlugu aalisarnermik, tunisassiornermik aqutsinermillu tunngassuteqarpoq. Taamaalilluni aalisarnerup inuussutissarsiorfiginerani aqunneqarneranilu suliffinnik assigiinngitsorpassuarni sulilernissamut periarfissiilluni.
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi Naalakkersuisoq Peter Borg Edna-p nalliuttorsiutigineqarnerani ima oqarpoq: ”Aalisarnermi ingeniøritut ilinniakkavit naammassinerani pilluarit. Kalaallit Nunaanni siullerpaallutit naammassinnipputit, torrak. Inuusuttortatta suliffigisinnaasaminni ilinniarsimasuunissaat pingaartuuvoq aamma uagut inuussutissarsiutitta pingaarnersaat sulisunik ilinniarsimasunik pisariaqartitsigaluttuinnarpoq. Aalisarnermut tunngasunik sulinerni pitsaanerpaamik atugaqarnissarnik kissaappakkit neriullungalu illit inuusuttut allat aalisarnermi ingeniøritut ilinniarusulernissaannut aalisarnermullu tunngasunik sulilerusulernissaannut isumassarsititsilluassasutit.”
Ednap ilinniarnermini naammassinninnerani, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen, aamma najuuppoq, taanna ima oqaaseqarpoq: “ Aalisarneq inuuniutitta pingaarnersaraat, taamaammat naalakkersuinikkut pingaartitaraarput aalisarnerup silarsuaani qaffasissumik iliniagaqarneq siuarsassallutigu. Edna illit nuannaarutigingaarpara tulluusimaarlungalu nunatsinni siullersaallutit aalisarnerup silarsuaani qaffasissumik ilinniagaqaleravit, pilluarujussuarit,” taanna oqarpoq.
