Avatangiisinut, Pinngortitamut, Nukissiuuteqarnermut Ilisimatusarnermullu Naalakkersuisoq, Jørgen “Juulut” Rosbach, Tasersiap aamma Tarsartuup Tasersuata erngup nukinganik innaallagissiorfissatut periarfissaasa neqeroorutigineqarnissaat pillugu Kangerlussuarmi, Kangaamiuni Maniitsumilu innuttaasunik ataatsimiititsisimavoq. Ataatsimiinnerni sumiiffinni pingasuni katillugit innuttaasut 100-t sinnilaarlugit peqataapput.
Innuttaasunik ataatsimiititsinerit siunertaraat Tasersiap aamma Tarsartuup Tasersuata erngup nukinganik innaallagissiorfissatut periarfissaasa neqeroorutigineqarnissaat pillugu suliaq qanoq ingerlanersoq pillugu paasissutissiissutigissallugu, kiisalu najukkani innuttaasut isiginnittariaasiat tusarniarlugu aammalu siunnersuutaat katersorlugit. Taakku Naalakkersuisunit neqerooruteqarnissamut piumasaqaatit inaarutaasumik aalajangersarneqarneranni suliami ingerlateqqinneqassapput.
Ataatsimiinnerni Naalakkersuisup ilisimatitsissutigaa Naalakkersuisut erngup nukinganik isumalluutinik atuisinnaatitaaneq pillugu piukkunnartussarsiuussinermik ukiamut tamanut saqqummiinissaat naatsorsuutigineqartoq. Piukkunnartussarsiuussineq naammassineqarpat Naalakkersuisut 2027-p ukiuata affaata siulliup ingerlanerani ingerlatseqatigiiffiit pingasut, neqerooruteqartitsilluni unammilleqatigiissitsinissamut inaarutaasumut ingerlaqqinnissamut qaaqquneqartussatut toqqarneqareersimassasut naatsorsuutigaat.
Taamanikkuttaaq Naalakkersuisut suliniutinut siunnersuutit aalajangersimasut nalilersornissaannut sukumiinerusumik tunngavissaqalissapput, tassunga ilanngullugit erngup nukinganik isumalluutit qanoq atorneqarnissaat eqqarsaatigineqarnersoq aammalu suliniutit qanoq ittunik ingerlatsinernik imaqarnissaat naatsorsuutigineqarnersoq.
Innuttaasunik ataatsimiititsinerni tamani najugaqartunut suliffissaqartitsinissaq, ilinniartitaaneq, pinngortitamut avatangiisinullu sunniutissat, kiisalu suliaqartoqassappat najugaqartunut aningaasaqarnikkut iluanaarutissat pillugit oqallisissanik saqqummiussisoqarpoq.
Kangerlussuarmi aamma Kangaamiuni suliassap pinngortitamut, taamatullu uumasunut, aallaaniarnermi soqutigisanut, aalisarnermut kulturikkullu kingornussanut sunniutissai pillugit apeqqutit saqqummiussuunneqarput. Aamma suliassap aningaasaqarnermut tunngasortai, suliaqartoqassappat isertitat qanoq iliorluni agguaanneqarnissaat, kiisalu najugaqartut sunik pissarsinissaat, suliassamilu suliffeqarfiit pilersinneqartussat suuneri apeqqutigineqarput.
Maniitsumi suliaqartoqassappat, suliassap qanoq ililluni najukkami ineriartortitsinissamut, suliffissanut siunissamilu ungasissumi annertusaanissamut iluaqutaasinnaanera immikkut aallunneqarpoq. Naalakkersuisut najukkami suliffissanik pilersitsisoqarnissaanik, aammalu ilinniartitaanernik piginnaaneqarfinnillu ineriartortitsinermik qulakkeerisoqarnissaanik, kiisalu suliffissuup tigooqqaasussap inissiffissaanik, taamaalillunilu Maniitsumi ataavarnerusumik ineriartortitsisoqarnissaanik ingerlatseqatigiiffinnut piumasaqaateqarsimanersut innuttaasunit amerlasuunit apeqqutigineqarpoq. Tamatuma peqatigisaanik ineriartortitsinermi pinngortitap, kiisalu najugaqartut aalisarnikkut piniarnikkullu soqutigisaasa ataqqineqarnissaat kissaatigineqartoq erseqqissarneqarpoq.
Naalakkersuisup paasissutissiissutigaa inatsisini siumut aalajangersarneqareersimasoq ingerlatseqatigiiffiit sulisunik najukkanneersunik aamma entreprenørinik najukkanneersunik atuissasut kiisalu avatangiisinut tunngatillugu inatsisitigut piumasaqaatit naammassissagaat, tassunga ilanngullugu VVM-mik (avatangiisinut sunniutissat pillugit naliliineq) nassuiaat akuersissutaareersoq.
Innuttaasunik ataatsimiititsinermi qulequtaq innuttaasunit najukkamilu kommunip sinniisuiniit saqqummiunneqartuartoq tassaavoq, suliaqartoqassappat tamatuma nuna tamakkerlugu isertitaqarnissamut iluaqutaaginnarani, aammattaaq najukkani inuiaqatigiinnut kommunimullu suliamik eqqorneqartunut ataavartumik iluanaarutaanissaata kissaatigineqarnera. Tassani ilaatigut suliffissaqarneq, ilinniartitaaneq, piginnaaneqarfinnik ineriartortitsineq najukkamilu nalilinnik pilersitsineq pillugu apeqqutit ilaatinneqarput.
Ataatsimiinnernut peqataanissamut piffissaqarsimasut tamaasa qutsavigerusuppakka. Tunniusimaneq annertooq apeqqutillu soqutiginartut amerlasuut misigaakka. Suliffissat, ilinniartitaaneq, pinngortitap eqqarsaatigineqarnissaa najukkamilu pissarsiassat ataavarnerusut pillugit kissaatinik angerlaassivugut. Taakku toqqaanissamut piumasaqaatit inaarutaasut aalajangersarlugit suliatta ingerlaqqinnissaannut ilaatinneqassapput,
Avatangiisinut, Pinngortitamut, Nukissiuutinut Ilisimatusarnermullu Naalakkersuisoq Jørgen Rosbach oqarpoq.
Najukkami eqqarsaatigisassat pillugit kommunip oqaloqatigineqarnissaanik qulakkeerinissaq Naalakkersuisut kissaatigaat. Aallaqqaammut Naalakkersuisup kommunalbestyrelsi suliassaq pillugu ataatsimeeqatiserissavaa.
Innuttaasunik ataatsimiititsinerit EU-p aamma Kalaallit Nunaata Grøn Vækst pillugu isumaqatigiissummut atatillugu EU-miit tapiiffigineqarlutik ingerlanneqarput.
