linniartitaanermut, Kultureqarnermut, Timersornermut Ilageeqarnermullu Naalakkersuisoqarfiup matumuuna nuannaarutigalugu nalunaarutigissavaa Arnannguaq Christiansen GUX Nuummiittumi rektoritut ulloq 1. august 2026 aallarnerfigalugu atorfinitsinneqarmat.
Arnannguaq Christiansen Nuummi GUX-imeersuuvoq ukiuni kingullerni ilaatigut pædagogikumimik ilinniagaqartut akisussaaffigisimallugit, ilinniartitsisutut ilinniartitsissutinilu siunnersortitut sulisimalluni, misilitsissutissanik suliaqartitani ilaasortaasimalluni kiisalu ilinniartitseriaatsimi, kulturit naapinneranni, allanngoriartornermilu masteritut ilinniarsimalluni.
Arnannguaq Christiansen soqutiginninnerujussuani aamma tunniusimanerujussuani pillugit ilisimaneqarpoq, taakku saniatigut ilinniarnertuunngorniarnerup silarsuaani misilittagaqarpoq amerlasuunik atorluarneqarsinnaasunik aamma ilinniarnertuunngorniarfinni unammillernartorpassuit ilisimaarilluarpai minnerunngitsumik kulturikkut oqaatsillu aallaavigalugit unammillernartut inuusuttut ullut tamaasa nalaattagaat.
Naalakkersuisoqarfiup Arnannguaq Christiansenimik toqqaanermigut piginnaasat nukittuffiillu taakku amerlasuut GUX Nuummiittumi patajaassutsimik ukiunilu aggersuni nutaamik eqqarsarnermik qulakkeerinninnissaq Naalakkersuisoqarfiup qularinngilaa, taamaattumillu Naalakkersuisoqarfiup rektori nutaaq suleqatigissallugu qilanaaraa.
