Sapaatip akunnerata naanerani arfininngornermi sapaammilu, juunip 13-anni 14-annilu 2026, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik kommunit tamaasa peqatigalugit iluatsilluartumik isumasioqatigiissitsivoq. Sammisaq tassaavoq ”Angerlarsimaffiup avataanut inissiisarnermut suliassaqarfimmi suliniutit”. Tamanna pingaarutilimmik oqimaatsumillu suliassaqarfiuvoq, tassanilu piaartumik iliuuseqartoqarnissaanik pisariaqartitsineq annertuvoq.
Isumasioqatigiinnermi anguniarneqarpoq angerlarsimaffiup avataanut inissiisarnerit ikilisarneqarnissaat, inissiisarnermut suliassaqarfimmi pitsaassutsip pitsaanerulersinneqarnissaa kiisalu aningaasartuutit appartinneqarnissaat. Isumasioqatigiissitsinermi peqataapput borgmesterit ilaat, politikkerit, pisortatigoortumik atorfilittat kommunineersut ilaat kiisalu Aningaasaqarnermut Naalakkersuisoqarfimmit sinniisuutitat aamma Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoq.
Isumasioqatigiinneq Deloittep inissiisarnermut suliassaqarfimmi aningaasartuutinut misissueqqissaarneranik tunngaveqarpoq, taannalu Naalakkersuisut nittartagaanni tamanut saqqummiunneqarnikuuvoq. Tamanna tunngavigalugu peqataasut ataatsimoorlutik suliassaqarfimmi unammillernartut pingaarnerit oqallisigaat aammalu aaqqiissutaasinnaasunik ineriartortitsinissamut ataatsimoorlutik suleqatigiillutik. Isumasioqatigiinnerup inernerisaanik suliniutissatut siunnersuutit aalajangersimasut arlallit saqqummiunneqarput.
”Maanna inissiisarnermut suliassaqarfimmi pitsaasunik amerlasuunik suliniuteqareerpugut, kisianni taakkua naammaginannginnerat oqaatigissavara. Taamaattumik pingaaruteqarpoq, kommunit ingerlatsinermut ilanngunneqarnissaat, taamaalillutalu ataatsimoorluta suliassaqarfik pitsaasumik ineriartortissinnaassagatsigu, Naalakkersuisutullu pingaartilluinnarpara allannguinissami kommunit ulluinnarni sulinerannut tunngasuni, kommunit peqatigalugit suliniutinik pitsanngorsaanissanik isumasioqatigiinnissaq. Tamanna meeqqanut ilaqutariinnullu iluaqutaassaaq aammalu suliassaqarfimmi atuisunut iluaqutaanerusumik patajaatsumillu sulinermik qulakkeerinnissalluni. Qujavungalu kommunit ataatsimeeqatiserinninnera tigulluarlugu peqataamata, suleriutsit pitsanngorsarneqarnissaannut malitassat malillugit aallartisarneq ingerlallualersinnaalerpoq” Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Mariane Paviasen Jensen taama oqarpoq.
Isumasioqatigiinnermi sammisaq aammalu inissiisarnermut suliassaqafimmi sulineq oqimaatsuuvoq sakkortusinnaasarlunilu. Taamaattorli pingaarutilerujussuupput, tamannalu peqataasunit tamanit ersarissumik malugineqarsinnaavoq.
”Peqataasut tamaasa qutsavigerusuppakka. Isumasioqatigiinnerup naammassinerani anivugut suliassanik utaqqisunik suliaqarnissamut nutaamik nukissaqarluta. Kommunit nangittumik suleqatigalugit suliniutit ingerlaavartumik ineriartortinnissaat qilanaaraara, taamaalilluni meeqqat inuusuttullu pitsaanerusumik atugassaqarnissaat anguneqarsinnaassammat” Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Marian
