Kommune Kujalleq aamma Innovation South Greenland suleqatigiinnissamut isumaqatigiissut 2026-2027-mut atuuttussaq atsioqatigiissutigeqqammerpaat. Kujataani inuussutissarsiornermi ineriartortitsineq ingerlateqqinneqarnissaa isumaqatigiissummi tunngaviuvoq.
Innovation South Greenland Kommune Kujallermit 2019-imi pilersinneqarpoq kommunimiillu pigineqarluni. ISG kommunimut, inuussutissarsiortunut suleqatigineqartartunullu allanut attaveqaataasussatut inissisimalluni. Suliffeqarfiit aallarnisaasullu siunnersorneqartarput, ilaatigut takornariaqarneq, inuussutissat, aalisarneq, piniarneq, nunalerineq, UNESCO Kujataa, aatsitassarsiorneq, ilinniartitaaneq ilisimatusarnerlu.
ISG-llu Naalakkersuisut kiffartuussinissamik isumaqatigiissutaat aqqutigalugu Nunalerinermut Siunnersuisoqarfik aamma ingerlappaa.
Isumaqatigiissut nutaaq 2025-mi sulianik amerlasuunik ingerlatsiviusumi tunngaveqarpoq, tassani ISG ilaatigut suliffeqarfinnut siunnersuineq, suliffeqarfinnik aallarnisaasunik immikkut ittumik siunnersorteqarneq – mentor aamma inkubatorimik taaneqartartumik ingerlatsinerit, takornariaqarnermut periusissiamik pilersitsineq, takornariaqarnermi piginnaasatigut pisariaqartitanik misissueqqissaarneq, kujataata nittarsaanneqarnera, inuussutissat pillugit nittarsaassinerit, nunalerineq, UNESCO Kujataa kiisalu najukkami, nunami tamarmi nunanilu tamalaani suleqatigisat oqaloqatiginerat sulissutigineqarsimallutik.
Ukiuni marlunni suliassat ersarissut
Isumaqatigiissummi nutaami ISG-p suliassaqarfiinni pingaarnerni arfiniliusuni suliassani ingerlateqqissavai: takornariaqarneq, UNESCO Kujataa, inuussutissarsiornermik ineriartortitsineq, aalisarneq, piniarneq nunalerinerlu, aatsitassarsiornermik inuussutissarsiorneq inuussutissalerinerlu.
Takornariaqarneq eqqarsaatigalugu takornariaqarnermut periusissiaq 2026-miit 2031-mut atuuttussaq ingerlateqqinneqassooq. Periusissaq ilaatigut nittarsaassinermik, ineriartortitsinermut siunnersuinermik – kiisalu takornariaqarnermut, inuussutissarsiornermut angallannermullu aqqutinik ineriartortitsinermut tunngatillugu nunani tamalaani suleqatiginneqarnerup nukittorsarnissaa anguniarneqassapput.
UNESCO Kujataa pillugu ingerlatsinermut pilersaarut naapertorlugu sulineq ingerlaqqissooq, ilaatigut kingornutassiaqarfinni illukut piujuartinneqarnissaat, sumiiffinni paasissutissiisutinik ilisarnaasersuinissaq, innuttaasunut sammisunik UNESCO-p ulloqartitsisarnissaannik ingerlatsinerit kiisalu UNESCO Kujataata 2027-imi ukiunik qulinngortorsiornissaanut piareersaanerit anguniarneqassapput.
Inuussutissarsiornermi anguniakkat tassaasartut suliffeqarfinnut aallarnisaassunullu siunnersuinerit ingerlateqqinneqassapput. Inuussuttunut sunngiffimmi suliffissanik amerlanerusunik pilersitsineq, utertitsilluni nuutsitsisarnerup siuarsarneqarnissaa, najukkami ineriartortitsineq, ataasiakkaaraluni aaqqissuusaassumik siunnersuineq (mentor aamma inkubatorimik ingerlatsinerit) – naggataatigut inuussutissarsiortut, kommuni, ilinniarfeqarfiit ilisimatusarfiillu akornanni suleqatigiinnerup qaninnerulersinneqarnissaa sulissutigineqassapput.
ISG-mi aamma ilaatigut aalisartunut, piniartunut savaatilinnullu atugassarititat pitsaanerulernissaat sulissutigineqassapput. Tamatumani ilaatigut siunersuineq, piginnaasanik ineriartortitsineq kiisalu kalaalimineerniarfiit ineriartortinneqarnissaat pineqarput, tassani tunisaqarnerulernissaq, nittarsaassineq, akiliisarnermi aaqqiissutit nutaat kiisalu Danmarkimi Kalaallit Illuinut tunisassiornissaq immikkut ukkatarineqassallutik.
Aatsitassarsiornermut tunngatillugu ISG-p ilaatigut najukkami pisariaqartitat pillugit paasissutissanik katersuineq ingerlatissavaa, innuttaasunik ataatsimiisitsinernik aaqqissuineq kiisalu aatsitassarsiornermik inuussutissarsiuteqarfimmi suliffissatigut periarfissat ersarissarnissaat sulissutigillugit.
ISG-mi siulersuisut siulittaasuata, Steffen Lundip isumaqatigiissutip inernera nuannaarutigaa:
– Isumaqatigiissut ukiuni tulliuttuni marlunni sulinissatsinnut ersarissunik tunngaviliivoq. Suliassat assigiinngitsorpassuupput, kisianni tamarmik ataatsimut isigalugu kujataani tamarmi inuussutissarsiornermut ingerlatsinermut periarfissanik amerlanerusunik, suliassaqartitsinermik annertunerusumik kiisalu pitsaanerusunik atugassaqartitsinissamik siunertaqarput. Kommune Kujalleq kiisalu nunap immikkoortuani suleqatigisat amerlasuut suleqatigeqqinnissaanut qilanaarpugut, ISG-mi siulersuisut siulittaasuat, Steffen Lund oqarpoq.
Borgmesteri Malene V. Rasmussen isumaqatigiissut nutaaq inuussutissarsiornermut pingaarutilimmik inissisimasoq erseqqissaaatigaa:
– Innovation South Greenland Kommune Kujallermi tamarmi siuariartornermik ineriartornermillu pilersitsinissamut sulinermi pingaarutilimmik suleqataavoq. Suleqatigiinnissamut isumaqatigiissut aqqutigalugu inuussutissarsiornermik ineriartortitsinermut ukkatarinninneq ingerlaannassooq, peqatigisaanillu inuussutissat, aallarnisaasut kiisalu aatsitassarsiornermik inuussutissarsiuteqarfik pillugit suliniutit nukittorsarneqassallutik. Ukiuni aggersuni periarfissarpassuit ammaanneqassapput, taamaattumillu ineriartorneq naleqarnerulersitsisoq pingaaruteqarluinnarpoq, suliffissanik pilersitsineq innuttaasunullu tamanut periarfissanik amerlanerusunik pilersitsiniarneq anguneqassappata ersarissunik anguniagaqarnissaq pingaaruteqarluinnartuuvoq, Malene V. Rasmussen oqarpoq.
Kommune Kujalleq aamma Innovation South Greenland kujataani inuussutissarsiornermik ineriartortitsinissamut suleqatigiinnerup ingerlateqqinneqarnissaa qilanaaraat.
