Kalaallit Nunaanni biilit allat atorneqartut amerliartorput. Kisitsisit nutaat takutippaat ATV-t kiisalu hybridbiilit elbiliillu ukiuni kingullerni malunnaatilimmik amerleriarsimasut – kisianni ineriartorneq aamma akileraarutinut malittarisassat allanngornerannik attuumassuteqarpoq.
2026 aallartinnerani Kalaallit Nunaanni hybridbiilit elbiliillu katillugit 2.528-it nalunaarsorneqarsimapput. Ukioq sioqqullugu 2.189-iusimapput, aammalu 2022-mut sanilliullugu marloriaatinngorsimallutik, taamanikkut biilit 1.273-iullutik.
Peqatigitillugu ATV-t nalunaarsorneqarsimasut amerlassusaat malunnaatilimmik qaffariarsimavoq, 2022-mi 646-init 2026-mi 1.322-inut.
Kisitsisit taakku saqqummerput Grønlands Statistik-ip motorkøretøjinik nalunaarsorneqarsimasunik nutaamik naatsorsueqqissaarnerani.
Peqatigitillugu Kalaallit Nunaanni biilit ataatsimut amerlassusaat suli qaffariartorpoq. 1. januar 2026-mi Kalaallit Nunaanni biilit pladeqarfiusut katillugit 15.958-it nalunaarsorneqarsimapput, taakkunannga 15.404-t motorillit.
Inunnik angallassissutit amerlassusaat 7.325-inut qaffassimavoq – ukiumut siulianut sanilliullugu 3,3 procentimik qaffariaateqarluni.
Nunami tamarmi biilit amerlanerulerput
Tupaallannanngilaq Nuuk suli illoqarfiuvoq biilinik amerlanerpaanik nalunaarsorneqarsimasunik, katillugit 6.673-inik, kingorna tulliullutik Sisimiut Ilulissallu.
