2026-imut ilinniartitaanermut pilersaarut amerlanerusunik aallartittitsissaaq, naammassinnittitsissaaq ingerlaqqittitsillunilu – kisianni unammillernartut suli annertupput.
Ilinniartitaanermut aaqqissuussinermi tamakkerluni ingerlaartartut ikippallaarput. Tamanna tassaavoq Naalakkersuisunit 2026-imut Ilinniartitaanermut Pilersaarummi nutaami qitiusumik sammisaq, atuarfinnit ingerlaqqiffiusuniillu ilinniartitsinerup kiisalu inersimasunut pikkorissaanerup nukittorsarneqarnissaanik siunertaqartoq.
Pilersaarummi unammillernartut annertuut erseqqissarneqarput: Meeqqat atuarfiata kingorna inuusuttorpassuit ingerlaqqinneq ajorput, ilinniarnertuunngorniarlutik naammassisut amerlasuut unitsittarput, kiisalu suliffimmi sungiusarfiit, kollegiani ineqarfiit ilinniartitsisullu ilinniarsimasut amigaatigineqarput – pingaartumik illoqarfiit anginerusut avataanni.
Peqatigitillugu pilersaarut takutitsivoq arnat angutillu kiisalu sumiiffiit akornanni assigiinngissutaasut ersarissut. Arnat angutinit amerlanerusut ilinniarnermik naammassinnittarput, aammalu kommuneni najugaqarfinnilu periarfissat assigiinngissuteqartorujussuupput.
– Ilinniartitaanerup qaffasinnerulernissaa inuiaqatigiinni piujuartitsinermut pingaaruteqartuuvoq, kisianni sumiiffiit suiaassutsillu assigiinngissutaat suli sunniuteqartorujussuupput, pilersaarummi allassimavoq.
Meeqqat atuarfiat qaffassarneqassaaq
2026-mi pingaarnertut sammisat ilaat tassaavoq meeqqat atuarfiat, tassanilu Naalakkersuisut ilinniartitsinerup pitsaassusaanik, aaqqissuussaanermik misilitsinnerillu piumasaqaataannik annertunerusumik nalilersuisussaapput.
Pingaartumik matematiki immikkut sammineqassaaq, pilersaarummi oqaatigineqarmat ukiuni kingullerni atuartut fagimi tassani piginnaasaasa appariartorsimanerat.
Tamatuma saniatigut nunap tamakkerlugu meeqqat ilinniartitsisunit ilinniarsimasunit ilinniartitsiffigineqarsinnaaqqullugit internetikkut ilinniartitsineq annertusarneqassaaq – aamma najugaqarfinni mikinerusuni ilinniartitsisunik amigaateqarfiunerpaasuni.
Naalakkersuisut meeqqat immikkut pisariaqartitsisut kiisalu atuarniarnermik ajornartorsiutillit (ordblindit) siusissukkut misissuiffigineqartarnissaat aammalu siunnerfilimmik ikiorserneqartarnissaat nukittorsarniarpaat.
Inuusuttut amerlanerusut meeqqat atuarfiata kingorna ingerlaqqittariaqarput
Pilersaarummi erserpoq inuusuttorpassuit meeqqat atuarfiata kingorna suli inuusuttunut ilinniartitaanernik aallartittanngitsut.
Taamaattumik Naalakkersuisut inuusuttunut ilitsersuineq nukittorsarniarpaat, suliffimmi sungiusarfiit amerlanerusut pilersinniarlugit kiisalu 15-it 17-illu akornanni ukiulinnut inuussutissarsiornermut ilinniarfinni tunngaviusumik immikkut ingerlatsinerit ineriartortinniarlugit.
Peqatigitillugu inuussutissarsiornermut ilinniartitaaneq nutarterneqassaaq, taamaalilluni suliffeqarnermi pisariaqartinneqartunut pitsaanerusumik naapertuunnerulissalluni.
Pilersaarummi aamma inersimasunut sulisunullu amerlanerusunik periarfissiisoqassaaq.
Aallarnisaanermi pingaaruteqartumi ilaat tassaavoq najugaqarfigisamiit ilinniarnissamut periarfissat ineriartortinneqarnissaat, taamaalilluni amerlanerusut internetikkut ilinniartitsineq sivikinnerusumillu ilinniartitsinerit ataatsimoortillugit angerlarsimaffiminnit ilinniarsinnaalissallutik.
