Pingasunngornermi ulloq 20. maj Ilinniartitaanermut, Kultureqarnermut, Timersornermut Ilageeqarnermullu, Naalakkersuisoq Nivi Olsen, kiisalu Danmarkimi Tuluit Nunaata aallartitaa, Victoria Elizabeth Billing, suleqatigiinnissamik isumaqatigiissummik nutaamik atsioqatigiipput, isumaqatigiissullu kalaallit bacheloritut ilinniarsimasut Tuluit Nunaanni Chevening Scholarship-inut ataqqisaanerpaanut qinnuteqarnissamut periarfissinneqassapput.
Isumaqatigiissut Kalaallit Nunaat Tuluit Nunaallu akornanni sivisuumik atuuttussamik ilinniartitaanikkut suleqatigiinnerup aallartinneranik ersersitsivoq – siunertaralugu Kalaallit Nunaanni kinguaariinnut tulliuttunut pisinnaasanik, nunani tamalaani suleqatigiinnernik kiisalu ilinniagaqarnissamut periarfissanik nukittorsaanissaq.
“Kalaallit Nunaanni ilinniartunut tamanna oqaluttuarisaanermut ilannguttussaq periarfissatsialaavoq. Tuluit Nunaanni universitetit nunarsuarmi pitsaanerpaat ilagaat, aammalu Chevening Scholarshipit aqqutigalugit inuusuttortagut nunarsuarmi qaffasinnerpaamik ilinniagaqarnissamut periarfissaqalissapput. Kalaallit Nunaat nunani tamalaani misilittagaqarluartunik ilinniarluarsimasunillu pisariaqartitsivoq, suleqatigiinnerlu tamanna siunissami Kalaallit Nunaannut pingaarutilimmik alloriarneruvoq,” Naalakkersuisoq Nivi Olsen oqarpoq.
Chevening Programme Tuluit Nunaata nunani tamalaani stipendiaqarfiutigaa pisortatigoortoq, Tuluit Nunaata nunanut allanut naalakkersuisoqarfiata aningaasalersugaa. Programmi aqqutigalugu ilinniartut pikkorissut nunanit tamalaanersut Tuluit Nunaanni tamakkiisumik aningaasalersorneqarlutik kandidatitut ilinniagaqarsinnaapput aammalu siunissami aqutsisunngornissamut aalajangiisartunngornissamullu nunarsuaq tamakkerlugu attaveqaataasumut ilanngullutik.
Danmarkimi Tuluit Nunaata aallartitaa, Victoria Elizabeth Billing, suleqatigiinnerup pingaaruteqassusaa pillugu oqarpoq:
“Kalaallit Nunaat Tuluit Nunaallu akornanni ilinniartitaanikkut suleqatigiinnerup nukittorsarnissaa nuannaarutigaarput. Tamanna aallartinnerinnaavoq, aammalu ilinniartitaanerup, ilisimatusarnerup kiisalu tuluttut ilinniartitsinerup nukittorsarneqarnissaanut suleqatigiinnerup ineriartortinneqarnissaa qilanaaraarput.”
Chevening Programme-mut qinnuteqarnissamut periarfissaq august 2026-mi periarfissaalissaaq.
Suleqatigiinneq kalaallit ilinniartunut nunani tamalaani ilinniarnissamut periarfissanik amerlanerusunik pilersitsinissamut aammalu Kalaallit Nunaata nunarsuarmi ilinniartitaanikkut suleqatigiinnerni inissisimaneranik nukittorsaanissamut pingaarutilimmik alloriarneruvoq.
