Ulloq unnuarlu paaqqinnittarfik imminut pigisoq MIA 2024-mi sulisut tamarmik pineqatissinneqarnikuunnginnerannut uppernarsaatit piaarnerpaamik piniarnissaannut peqquneqarpoq. Isumaginninnermut, Suliffeqarnermut, Nunamullu Namminermut Naalakkersuisoqarfik suliap malinnaaffiginissaanut nalunaarusiami nutaami taamatut nalunaarpoq, saniatigullu nalunaarutigalugu, pissutsit isorineqartut iluarsineqareersut maannalu piumasaqaatinik naapertuisoqalersoq.
Nalunaarusiami tassani nakkutiginnittussaqarfimmiit nalilerneqarpoq, meeqqanik inuusuttunillu isumagisariaqakkanik katsorsartariaqakkanillu MIA-p isumaginninnissaanut naammattumik pitsaassusilimmik isumaginninnissaanut piginnaasaqartoqartoq. Nalunaarusiami paaqqinnittarfik ”ilorraap tungaanut ingerlalersutut” nalilerneqarpoq, pissutsillu maannakkut aalajallutillu eqqissisimanararneqarlutik.
Siornatigut nakkutilliisoqartarnerani arlalitsigut isorisassaqartartoq
Kingullermilli nakkutilliisoqarnerani pineqaatissinneqarnikuunnginnermut upppernarsaatit kisimik ajornartorsiutigineqanngillat.
MIA aamma isorineqarnikuuvoq meeqqanillu innarliinikuunnginnermut uppernarsaatit amigaatigineqarmata noqqaaqquneqarnikuulluuvoq, malittarisassat erseqqarlunnerarnikuullutik, kiisalu piginnaasaqarluartunik siulersuisoqarnissaa sulisullu paaqqinnittarfimmi perorsaariaasaannut pitsaanerusumik ilisimasaqarnissaat pisariaqartutut oqaatigineqarluni.
Nalunaarusiami aamma allassimavoq, nakkutiginninnerup nalaani ineqartunut amerlassusereqqusaasut sinnerlugit MIA-mi najugaqartoqartoq.
Nakkutiginnittussaatitaasoq nalunaarusiami nutaami tassani nalunaarpoq, siornatigutt peqqussusiinerit innersuutillu tamarmik maanna paaqqinnittarfimmi malittarineqartut.