Kalaallit Nunaanni inuussutissarsiornermi atugassarititat pitsanngorniarlugit unammillernartunillu annikillisaaniarluni politikkikkut ukkatiginnittoqarpoq.
Naalakkersuisunut Siulittaasup, Jens-Frederik Nielsenip, marlunngornermi Future Greenlandimi suliffeqarfinnut aningaasatigut sinaakkutassanik allannguinissamik ersarissumik oqariartuuteqarpoq – uani suliffeqarfinnut akileraarusersuineq aamma aallarnisaasunut tapiutit ilanngullugit.
Jens-Frederik Nielsenip oqaaseqarnera malillugu Naalakkersuisut suleriusissamik aallarnisaalereersimapput, tassani suliffeqarfiit oqinnerusumik ingerlatsisinnaalernissaat nunatsinnilu inerisaasinnaanngornissaq oqinnerusumik pilersinneqarsinnaanngorluni.
“Inuussutissarsiuteqartutsinnut sinaakkutitut piumasaqaatit misissuleruttorpagut,” Sulisitsisut sulilersuisunut aqutsisup, Krissie Berthelsen Winbergip, oqaloqatiginerani taamak oqaaseqarpoq.
Ilaatigut aallarnisaasunik nukittorsaanissamut pisariaqartitsineq aamma qajannaannerusumik aningasaqarnissamik pilersitsinissaq eqqartorpai.
“Aallarnisaasartunik inerisaasartunillu siuarsaanissamut kissaateqarneq apeqquserneqarsinnaanngilaq, taaneqartummi atugarissaarnissatsinnut aamma kivitseqataasussaapput,” Naalakkersuisunut Siulittaasoq taamak oqaaseqarpoq.
Akileraarnermut aaqqissuusseqqinneq tullernguuppoq
Jens-Frederik Nielsen malillugu Naalakkersuisunut suliassani pingaarnerpaanut ilaasoq tassaavoq, inuussutissarsiuteqartunut akilaarnermut aaqqissuusseqqinnissaq.
Ilisimatitsiivoq, Naalakkersuisut suliffeqarfinnut akileraarnermut sinaakkutaliunneqarsimasut inuussutissarsiornermut pitsanngorsaanermut suliaqarnermut atatillugu misissussagaat.
“Akileraarnermut piumasaqaatinut sinaakkutigut misissussavagut. Inuussutissarsiortunut akileraarnermut aaqqissuusseqqippugut,” oqarpoq nangillunilu, aaqqissuusseqqinneq qinersinerup nalaani suliarineqarluni naammassinissaa naatsorsuutigineqassasoq.
Aammattaaq ersarissarpaa, unammillernartitat kisimi aningaasaniinngitsut, sulisussanillu aamma inuiaqatigiinni ataqatigiissaarineq amigaatigineqartut.
Jens-Frederik malillugu pingaaruteqarpoq, nuna tamakkerlugu suliffeqarfiit sumiiffimminni naleqarnerulissutaasussamik suliffissaqarnerulissutaasussamillu periarfissaqarnerulissutigissagaat.
Sulisitsisut: Oqaloqatigiinneq iluaqutaavoq
Sulisitsisuni Naalakkersuisut inuussutissarsiornermi piumasaqaasiaat pitsaasumik ukkatigineqarput.
Krissie Berthelsen Winberg ersarissaavoq, suliffeqarfiup naalakkersuisoqarfiusimasumik aamma maannakkut naalakkersuisuusunik qanimut oqaloqateqartarnerit ingerlanneqartartut, aaqqiinissamullu suleqatigiinnissaq oingaaruteqartoq.
Aammattaaq ersarissarpaa, suliffeqarfeeqqat mikinerusut akunnannerusumillu angissuseqartut inuiaqatigiinni akisussaaffimmik tiguseqataareersut – ilaatigut ilinniartunik tigusillutik, suliffissanik pilersitsillutik inuiaqatigiinnilu namminneq kajumissutsiminnik suliaqartalereersimallutik.
“Oqaloqatigiinnerput ingerlattuassavarput, aaqqiissutissanillu nassaassarsiortuaannarluta,” taamak oqqaseqarpoq.